មន្ដ្រី​អូឡាំពិក​​ថៃ​ អះអាង​ពី​​ការ​​រៀន​សូត្រ​ច្រើន​​ពី​កម្ពុជា​ត្រៀម​ធ្វើ​ម្ចាស់​​ផ្ទះ​​ស៊ីហ្គេម​​២០២៥

ប្រទេស​ថៃ​ក៏​កំពុង​ត្រៀម​ខ្លួន​រៀបចំ​ការ​ប្រកួត​កីឡា​ស៊ីហ្គេម លើកទី​៣៣ ឆ្នាំ​២០២៣ បន្ត​វេន​ពី​កម្ពុជា​ដែល​រៀបចំ​លើក​ទី​៣២ ឆ្នាំ​២០២៣​នេះ​នៅ​រាជ​ធានី​ភ្នំពេញ​។ សម្រាប់​ការ​រៀបចំ និង​ត្រៀម​ខ្លួន​របស់​កម្ពុជា​ត្រូវ​បាន​មន្ត្រី​ជាន់​ខ្ពស់​នៃ​គណៈកម្មាធិការ​ជាតិ​អូឡាំពិក​ថៃ​កោត​សរសើរ និង​​រៀន​សូត្រ​តាម។

លោកស្រី Supitr Samahito នាយបេសកកម្មរង និងជាអនុប្រធានគណៈកម្មាធិការជាតិអូឡាំពិកថៃ (NOCT) បាន​ប្រាប់ Cambodia 2023 ថា ការត្រៀមធ្វើម្ចាស់ផ្ទះការប្រកួតកីឡាស៊ីហ្គេម លើកទី៣២ ឆ្នាំ២០២៣ ជាលើកដំបូងរបស់កម្ពុជា​គឺ​បាន​ល្អ​គួរ​ឲ្យ​រៀន​សូត្រ​តាម។

«ក្នុងនាមម្ចាស់ផ្ទះបន្ដវេនពីកម្ពុជា ខ្ញុំបានរៀនសូត្រច្រើន។ បរិយាកាសក្នុងបន្ទប់ប្រជុំនាយបេសកកម្ម គឺខ្ញុំ​ពេញ​ចិត្ត សាមញ្ញា តែ​ថ្លៃថ្នូរ និងមាន​របៀបរៀបរយយ៉ាងល្អ។ ការរៀបចំពិធីរាប់ថយក្រោយ ១០០ថ្ងៃរបស់កម្ពុជា។ ពិធីរាប់ថយក្រោយរបស់កម្ពុជា បានយកប្រជាជាតិអាស៊ីអាគ្នេយ៍ទាំងមូលទៅសម្ដែងនៅលើឆាក ហើយអញ្ជើញនាយបេសកកម្មទាំងអស់ចូលរួម ដែលបញ្ជាក់អំពីសាមគ្គីភាព រវាងប្រជាជាតិអាស៊ីអាគ្នេយ៍ ហើយយើងនឹងព្យាយាមធ្វើយ៉ាង​ណា​ឲ្យមានកម្មវិធីស្រដៀងគ្នា និងពិធីបិទ ដើម្បីមកទទួលទង់ស៊ីហ្គេមបន្ដពីកម្ពុជា»។ លោក​ស្រី​បាន​រៀប​រាប់។

លោកស្រី Supitr Samahito បន្ត​ថា ៖«ពិធីរត់ភ្លើងគប់ ទៅកាន់ប្រទេសសមាជិកទាំង១០ ខ្ញុំមានអារម្មណ៍ថា កម្ពុជាបានពញ្ញាក់អារម្មណ៍ប្រជាជាតិអាស៊ីអាគ្នេយ៍របស់យើងពី​ស៊ីហ្គេមជិតមកដល់ហើយ។ អ៊ីចឹងថៃ គួរតែធ្វើអ្វីដែលស្រដៀងហ្នឹង (ស្រដៀងកម្មវិធីរៀបចំ) ។ ហេតុនេះ ខ្ញុំបានរៀនសូត្រច្រើនមុនស៊ីហ្គេម នៅកម្ពុជា ហើយទម្រាំពេលហ្គេមកដល់ ខ្ញុំគិតថា ខ្ញុំនឹងទទួលបានបទពិសោធន៍ថ្មីៗបន្ថែមទៀត សម្រាប់យកទៅប្រទេសថៃ ដើម្បីត្រៀមរៀបចំធ្វើម្ចាស់ផ្ទះស៊ីហ្គេមបន្ដវេន បន្ទាប់ពីកម្ពុជា»៕

អត្ថបទ៖ វីរបុត្រ