កីឡា

វៀតណាមសល់លុយហោចណាស់៥ម៉ឺនដុល្លារក្នុង១ថ្ងៃពីស៊ីហ្គេមនៅកម្ពុជា

បានផុស

២ years មុន

នៅ

ថ្ងៃព្រហស្បតិ៍ ២០ មេសា ២០២៣

ដោយ

ប្រទេសវៀតណាមនៅសល់លុយយ៉ាងហោចណាស់៥ម៉ឺនដុល្លារអាមេរិកក្នុង១ថ្ងៃៗសម្រាប់ការចូលរួមប្រកួតកីឡាស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា។

កម្ពុជាក្នុងនាមជាម្ចាស់ផ្ទះបានទទួលបន្ទុកទាំងអស់លើការចំណាយ ក្នុងនោះការចំណាយលើកត្តា៣សំខាន់គឺសំបុត្រចូលទស្សនាដោយឥតគិតថ្លៃទាំងអ្នកគាំទ្រជាតិ និងអន្តរជាតិ, ផ្តល់សិទ្ធិផ្សព្វផ្សាយដោយឥតគិតថ្លៃទាំងសារព័ត៌មានជាតិ និងអន្តរជាតិ។ ជាពិសេសមិនគិតថ្លៃលើម្ហូបអាហារ ការស្នាក់នៅ និងការធ្វើដំណើរក្នុងប្រទេសកម្ពុជាដល់គ្រប់អត្តពលិក និងប្រតិភូកីឡាអាស៊ានទាំងអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមគោលការណ៍ ប្រទេសជាម្ចាស់ផ្ទះកីឡាស៊ីហ្គេម និងអាស៊ានប៉ារ៉ាហ្គេម យ៉ាងហោចណាស់ត្រូវឲ្យអត្តពលិក និងប្រតិភូកីឡាម្នាក់ៗបង់ប្រាក់៥០ដុល្លារក្នុង១ថ្ងៃឲ្យប្រទេសជាម្ចាស់ផ្ទះ។ ពួកគេអាចចំណាយលើសនេះថែមទៀត ប្រសិនបើស្នាក់នៅសណ្ឋាគារកាន់តែទំនើប។ យ៉ាងណា តម្លៃ៥០ដុល្លារដែលម្នាក់ៗត្រូវបង់ក្នុង១ថ្ងៃៗត្រូវបានម្ចាស់ផ្ទះស៊ីហ្គេមលើកទី៣២ គឺកម្ពុជាមិនឲ្យភ្ញៀវចំណាយឡើយ។

ផ្អែកលើចំណុចនេះ គ្រប់សមាជិកអាស៊ានទាំង១០ប្រទេសដែលបានចុះឈ្មោះចូលរួមប្រកួតស៊ីហ្គេម នៅកម្ពុជានៅសល់ប្រាក់រាប់ម៉ឺនដុល្លារ។ ជាក់ស្តែងប្រទេសវៀតណាមគ្រោងបញ្ជូនអត្តពលិក និងប្រតិភូចំនួន១៦៦៣នាក់ ដូច្នេះនៅពេលកម្ពុជាមិនតម្រូវឲ្យបង់ប្រាក់ វៀតណាមអាចសល់លុយយ៉ាងហោចណាស់ក៏៥ម៉ឺនដុល្លារអាមេរិកក្នុង១ថ្ងៃ។

ស្របពេលកីឡាស៊ីហ្គេមនៅកម្ពុជាចាប់ផ្តើមប្រកួតពីថ្ងៃទី២៩ ខែមេសា រហូតដល់ថ្ងៃទី១៧ ខែឧសភាទើបចប់ ប៉ុន្តែកីឡាមួយចំនួនត្រូវមកមុនថ្ងៃប្រកួត និងក្រោយចប់ការប្រកួតទើបវិលត្រឡប់ទៅប្រទេសកំណើតវិញ៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣