លោក Honda៖ទោះបីឱកាសមានតិចតួចប៉ុណ្ណាក៏ដោយ ក៏មិនបោះបង់ដែររហូតដល់នាទីចុងក្រោយ

លោក Keisuke Honda គ្រូបង្វឹកក្រុមបាល់ទាត់ជម្រើសជាតិកម្ពុជាអាយុក្រោម២២ឆ្នាំ នៅតែមានសុទិដ្ឋនិយមចំពោះក្រុមកីឡាករកម្ពុជាក្នុងការប្រកួតតទល់នឹងក្រុមបាល់ទាត់ជម្រើសជាតិឥណ្ឌូនេស៊ីអាយុក្រោម២២ឆ្នាំ នៅថ្ងៃទី១០ ខែឧសភានេះ។ លោក បានអះអាងថា បើទោះបីនៅសល់ឱកាសតិចតួចប៉ុណ្ណាក៏ដោយ ក៏មិនបោះបង់ដែររហូតដល់នាទីចុងក្រោយនៃការប្រកួត។

លោក Keisuke Honda បានសរសេរលើទំព័រហ្វេសប៊ុករបស់ខ្លួនយ៉ាងដូច្នេះថា៖«We still believe even a small possibility. Never give up until the End» គឺមានន័យថា«យើងនៅតែជឿជាក់ ទោះបីយើងមានឱកាសតិចតួចស្តួចស្តើងយ៉ាងណាក៏ដោយ គឺមិនបោះបង់ទេរហូតដល់នាទីចុងក្រោយ»។

ពាក្យសម្តីដ៏មានអត្ថន័យរបស់លោក Keisuke Honda បែបនេះ ធ្វើឡើងនៅមុនក្រុមបាល់ទាត់ជម្រើសជាតិកម្ពុជាអាយុក្រោម២២ឆ្នាំ ត្រូវប្រកួតជាមួយនឹងក្រុមបាល់ទាត់ជម្រើសជាតិឥណ្ឌូនេស៊ីអាយុក្រោម២២ នៅថ្ងៃស្អែកនេះក្នុងវគ្គជម្រុះនៃព្រឹត្តិការណ៍ស៊ីហ្គេមដែលកំពុងធ្វើឡើងនៅក្នុងប្រទេសកម្ពុជា។ ការប្រកួតនៅថ្ងៃស្អែកនេះ ក្រុមកម្ពុជា ត្រូវការឈ្នះក្រុមឥណ្ឌូនេស៊ី ដាច់ខាត ដើម្បីអាចទទួលបានឱកាសឡើងទៅវគ្គជម្រុះ៤ក្រុមចុងក្រោយ។ ប៉ុន្តែ អាចទៅរួចលុះត្រាតែក្រុមមីយ៉ាន់ម៉ាចាញ់ការប្រកួតជាមួយក្រុមហ្វីលីពីន នៅថ្ងៃដដែលនោះ។

បច្ចុប្បន្ន ក្រុមជម្រើសជាតិកម្ពុជាអាយុក្រោម២២ឆ្នាំ កំពុងឈរនៅលេខទី៣នៅក្នុងពូលA បន្ទាប់ពីចាញ់ក្រុមមីយ៉ាន់ម៉ាកាលពីថ្ងៃទី០៧ ខែឧសភា ឆ្នាំ២០២៣។ ចំណែក ក្រុមមីយ៉ាន់ម៉ា​ ឈរនៅលេខរៀងទី២តាមពីក្រោយឥណ្ឌូនេស៊ីដែលកំពុងឈរលេខរៀងទី១ ជាក្រុមខ្លាំងបំផុតនៅក្នុងពូលA នេះ៕