កីឡា

ម៉ោង២ថ្ងៃនេះ ក្រុមបាល់បោះរទេះនារីកម្ពុជាប៉ះក្រុមខ្លាំងម្ចាស់ផ្ទះចិន

បានផុស

៣ years មុន

នៅ

ថ្ងៃសៅរ៍ ២១ តុលា ២០២៣

ដោយ

ក្រុមបាល់បោះរទេះពិការនារីកម្ពុជានឹងប្រកួតជាមួយម្ចាស់ផ្ទះចិនដែលជាក្រុមខ្លាំងវេលាម៉ោង៣រសៀល ថ្ងៃសៅរ៍នេះ ក្នុងព្រឹត្តិការណ៍កីឡាអាស៊ីប៉ារ៉ាហ្គេម លើកទី៤ ឆ្នាំ២០២៣ នៅប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការប្រកួតសន្សំពិន្ទុលើកទី៣ដូចគ្នាសម្រាប់ក្រុមទាំងពីរដើម្បីប្រជែងរកចំណាត់ថ្នាក់ល្អក្នុងពូលដើម្បីឱកាសប្រកួតដណ្តើមមេដាយ។

បើកឆាក ក្រុមកម្ពុជាបានយកឈ្នះឡាវដោយលទ្ធផល ៦៥-៣៥ កាលពីថ្ងៃទី១៩ ខែតុលា និងការប្រកួតលើកទី២ បានចាញ់ក្រុមខ្លាំងជប៉ុនដោយពិន្ទុដាច់ឆ្ងាយមែនទែន ១៨-៨៨ កាលពីថ្ងៃទី២០ ខែតុលា។

ចំពោះក្រុមម្ចាស់ផ្ទះចិន ប្រកួតលើកទី១បានឈ្នះ ថៃ ដោយលទ្ធផល ៧២-២៣ និងប្រកួតលើកទី២ឈ្នះ ឡាវ ដោយលទ្ធផល ៨០-៣៨។ ដូច្នេះចិនបានឈ្នះ២ប្រកួតជាប់គ្នា។

សូមបញ្ជាក់ថា វិញ្ញាសាបាល់បោះរទេះនារីនេះមាន៦ប្រទេសចូលរួមប្រកួតគឺ កម្ពុជា ចិន ជប៉ុន អ៉ឺរ៉ង់ ថៃ និង ឡាវ។ បន្ទាប់ពីចប់វិលជុំសន្សំពិន្ទុ ក្រុមលេខ១ និងលេខ២ ត្រូវប្រកួតវគ្គផ្តាច់ព្រ័ត្រដណ្តើមមេដាយមាស ខណៈក្រុមលេខ៣ និងលេខ៤ ត្រូវប្រកួតដណ្តើមមេដាយសំរិទ្ធ ហើយក្រុមលេខ៥ និងលេខ៦ ត្រូវប្រកួតណ្តើមចំណាត់ថ្នាក់លេខ៥។

គិតត្រឹម២ប្រកួតដូចគ្នា ចិន និង ជប៉ុន ឈរលេខ១ និងលេខ២ បន្ទាប់ពីឈ្នះ២ប្រកួតដូចគ្នា ខណៈ ថៃលេខ៣ និងកម្ពុជាឈរលេខ៤ ក្រោយឈ្នះ១ និងចាញ់១ដូចគ្នា ហើយអ៉ីរ៉ង់ និងឡាវចាញ់ទាំងពីរ៕

អត្ថបទ៖ វីរបុត្រ