កីឡា

CPL ចប់ជើងទី១ ព្រះខ័នរាជស្វាយរៀងរក្សាកំណត់ត្រាមិនចាញ់ ខណៈគិរីវង់ស្គាល់ជ័យជម្នះដំបូង

បានផុស

៣ years មុន

នៅ

ថ្ងៃចន្ទ ៣០ តុលា ២០២៣

ដោយ

ការប្រកួតខេមបូឌានព្រីមៀរលីគរដូវកាល២៣-២៤ បានបញ្ចប់ជើងទី១ហើយដោយក្លិបបាល់ទាត់ព្រះខ័នរាជស្វាយរៀងបានឈរលើកំពូលតារាងតាំងពីសប្តាហ៍ទី១រហូតដល់សប្តាហ៍ទី៩ ដែលបញ្ចប់ទៅកាលពីថ្ងៃអាទិត្យ ទី២៩ ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខេមបូឌានព្រីមៀរលីគរដូវកាល២០២៣-២៤ ជើងទី១បានចាប់ផ្តើមកាលពីថ្ងៃទី៥ ខែសីហា រហូតដល់ថ្ងៃទី២៩ ខែតុលា មានចំនួន៩សប្តាហ៍។ ក្រុមទាំង១០មានការប្រកួតប្រជែងគួរឲ្យចាប់អារម្មណ៍ បើប្រៀបធៀបនឹងរដូវកាលមុនៗ។

ព្រះខ័នរាជស្វាយរៀងបានបង្កើតកំណត់ត្រាឈ្នះទាំង៩ប្រកួត ដោយរកបាន២៧ពិន្ទុពេញ និងកំពុងឈរលើកំពូលតារាង។ ក្រុមចំណាត់ថ្នាក់លេខ២គឺភ្នំពេញក្រោនរកបាន២១ពិន្ទុតាមរយៈលទ្ធផល ឈ្នះ៧ និងចាញ់២ ខណៈចំណាត់ថ្នាក់លេខ៣កាន់កាប់ដោយវិសាខា ដែលរកបាន១៨ពិន្ទុពីការឈ្នះ៦ និងចាញ់៣ ហើយបឹងកេតឈរចំណាត់ថ្នាក់លេខ៤តាមរយៈជ័យជម្នះ៤ ស្មើ១ និងចាញ់៤ ដោយបាន១៣ពិន្ទុ។

ក្រសួងការពារជាតិរកបាន១០ពិន្ទុ ឈរលេខ៥ បន្ទាប់ពីឈ្នះ៣ ស្មើ១ និងចាញ់៤ ហើយក្រុមខេត្តព្រៃវែង រកបាន១០ពិន្ទុ ឈរលេខ៦ ពីជ័យជម្នះ៣ ស្មើ១ និងចាញ់៥។ ចំណែក អាយអេសអាយ ដង្កោសែនជ័យ មិនអាក្រក់ពេកទេដោយរកបាន១០ពិន្ទុ ឈរលេខ៧ ពីជ័យជម្នះ៣ ស្មើ១ និងចាញ់៤។

ដោយឡែកណាហ្គាវើលដ៍ហាក់ដុនដាបជាងរដូវកាលមុនៗសម្រាប់ជើងទី១រដូវកាលនេះដោយរកបាន៩ពិន្ទុ ឈរលេខ៨ បន្ទាប់ពីឈ្នះ២ ស្មើ៣ និងចាញ់៤ ហើយអង្គរថាយហ្គឺររកបានតែ៤ពិន្ទុ ស្ថិតនៅបាតតារាង បន្ទាប់ពីឈ្នះ១ ស្មើ១ និងចាញ់៧។

នៅសប្តាហ៍ចុងក្រោយនៃជើងទី១ ក្រុមគួរឲ្យចាប់អារម្មណ៍គឺ គិរីវង់សុខសែនជ័យ បានបញ្ចប់កំណត់ត្រាមិនដែលឈ្នះរបស់ខ្លួន បន្ទាប់ពីបានយកឈ្នះលើក្រុមខ្លាំងភ្នំពេញក្រោនដោយលទ្ធផល ១-០។ នេះជាជ័យជម្នះលើកដំបូង ក្រោយ៨សប្តាហ៍កន្លងទៅស្មើ២ និងចាញ់៦។

ជ័យជម្នះលើកដំបូងនេះបានជួយឲ្យ គិរីវង់សុខសែនជ័យ រកបាន៥ពិន្ទុ ឡើងផុតពីបាតតារាងដែលបានស្ថិតនៅអស់រយៈពេល៨សប្តាហ៍ហើយដើម្បីឡើងមកកាន់ចំណាត់ថ្នាក់លេខ៩លើអង្គរថាយហ្គឺរ៕

អត្ថបទ៖ វីរបុត្រ

Related Topics:ខេមបូឌានលីគ (Cambodian Premier League)

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា