Henderson ត្រឡប់ទៅអឺរ៉ុបវិញ ក្រោយមានបញ្ហានៅអារ៉ាប៊ីសាអ៊ូឌីត

Jordan Henderson គ្រោងនឹងធ្វើដំណើរទៅកាន់ទីក្រុង Amsterdam នៅ​ចុងសប្តាហ៍នេះ ដើម្បី​ដើម្បី​ចូល​រួម​ជា​មួយ​ក្លិប Ajax បន្ទាប់ពីមានការព្រមព្រៀង​លើកកិច្ចសន្យាក្នុងការចាកចេញក្លិប Al-Ettifaq នៅអារ៉ាប៊ីសាអ៊ូឌីត។

បច្ចុប្បន្នភាគីទាំង២ កំពុងពិភាក្សាលម្អិតចុងក្រោយនៃកិច្ចសន្យា ហើយខ្សែបម្រើជម្រើសជាតិអង់គ្លេសរូបនេះនឹងចូលរួមជាមួយក្លិបយក្ស Ajax ដែល​កំពុងស្ថិតនៅចំណាត់ថ្នាក់លេខ៥ លីគកំពូលហូឡង់។ ស្ថានភាពបច្ចុប្បន្នរបស់ Ajax មិនរំខានដល់ការនាំយកខ្សែបម្រើ Henderson ឡើយ។ កីឡាករវ័យ៣៣ឆ្នាំរូបនេះនឹង​ធូរស្រាល បន្ទាប់ពីការចាកចេញពីប្រទេសអារ៉ាប៊ីសាអ៊ូឌីត​ ក្រោយមានភាពចម្រូងចម្រាស និងតាមទស្សនៈផ្ទាល់ខ្លួនពីការមិនពេញច្បាប់ក្នុងប្រទេសអារ៉ាប៊ីសាអ៊ូឌីត​ ដោយកំណត់ថា ការស្រឡាញ់ភេទដូចគ្នាគឺខុសច្បាប់ ហើយត្រូវផ្តន្ទាទោសប្រហារជីវិត។

Henderson ទទួលបានការរិះគន់យ៉ាងខ្លាំងចំពោះការចូលរួមជាមួយ Al-Ettifaq ​កាល​ពីខែកក្កដា បន្ទាប់ពីទទួលបានជោគជ័យខ្លាំងក្នុងរយៈពេល១២ឆ្នាំ ជាមួយក្លិប Liverpool នៅ​អង់គ្លេស។ ការ​ទទួល​បាន​ប្រាក់​ចំណូល​ច្រើន​ ប្រហែលជា ៣៥០,០០០ ផោនក្នុងមួយសប្តាហ៍ ជាកម្លាំងចិត្តដែលជំរុញឲ្យរូបគេផ្លាស់ទៅកាន់លីគអារ៉ាប៊ីសាអ៊ូឌីត។

Henderson មិនទទួលបានការចាប់អារម្មណ៍យ៉ាងខ្លាំង​ឡើយ បន្ទាប់ពីបង្ហាញទម្រង់លេងមិនសូវបានល្អក្នុងអំឡុងពេលធ្វើការជាមួយអតីតប្រធានក្រុម Liverpool លោក Steven Gerrard ដែលជាគ្រូបង្វឹក។ បច្ចុប្បន្នក្លិប Al-Ettifaq កំពុងឈរនៅលេខ៨ ក្នុងនៅ Saudi Pro League។ ដូច្នេះទើបរូបគេបង្ខំចិត្តត្រឡប់​ទៅអឺរ៉ុបវិញ ដោយបោះបង់មហិច្ឆតា​នៅ​អារ៉ាប៊ីសាអ៊ូឌីត​​ដែល​កំពុង​លេច​ធ្លោ​ក្នុង​ពិភពបាល់ទាត់៕

ប្រែសម្រួល៖ ផា រតនា
ប្រភព៖ Theguardian