កីឡា

ការដាក់កីឡាករបរទេសលេងក្នុងពានសម្ដេច តេជោមានផលល្អច្រើន

បានផុស

៥ ខែ មុន

នៅ

ថ្ងៃសុក្រ ១៩ មករា ២០២៤

ដោយ

ក្នុងការប្រកួតពានរង្វាន់ សម្ដេចអគ្គមហាសេនាបតីតេជោ ហ៊ុន សែន លើកទី១៧ (ថ្នាក់ជាតិ) ក្នុងរដូវកាលនេះមានកំណែទម្រង់ថ្មី ដោយអនុញ្ញាតឲ្យកីឡាករបរទេសចូលលេងដែលជាហេតុធ្វើឲ្យការប្រកួតប្រជែងខ្លាំង និងជក់ចិត្តសម្រាប់អ្នកគាំទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រូបង្វឹកក្រុមក្រសួងការពារជាតិ លោក ភា សុភ័ត្រ្តា បានមើលឃើញពីចំណុចវិជ្ជមានជាច្រើន ក្នុងការធ្វើកំណែទម្រង់ថ្មីមួយនេះ។ លោកគិតថា វាជាឱកាសថ្មីមួយទៀតសម្រាប់កីឡាករកម្ពុជាដែលអាចរកសូត្រពីកីឡាករបរទេស និងស្វែងរកចំណុចចន្លោះប្រហោងរបស់ខ្លួនដើម្បីប្រជែងឱកាសបង្ហាញខ្លួនលើទីលាន។

លោក ភា សុភ័ត្រ្តា បានប្រាប់«កម្ពុជាថ្មី»ថា ៖«នេះជាកំណែទម្រង់ដ៏ល្អបំផុត ដើម្បីឲ្យក្រុមក៏ដូចជាកីឡាកររបស់កម្ពុជាយើងទទួលបានឱកាសនៃការប្រកួតប្រជែងក្នុងព្រឹត្តការណ៍ធំៗក្នុងស្រុកបែបនេះដែលមានទាំងកីឡាករបរទេសចូលរួម។ នេះគឺដើម្បីពង្រឹងកីឡាករយើងឲ្យមានសមត្ថភាពកាន់តែខ្ពស់ ក្នុងការប្រជែងលើឆាកអន្តរជាតិ ទាំងការប្រកួតនៅក្រុមជម្រើសជាតិ និងក្លិបអាជីព»។

ជាក់ស្តែងបើក្រឡែកមើលការប្រកួតរវាងក្រុមកំពង់ចាមជាមួយក្រុមវិសាខាក្នុងជើងទី១កាលពីថ្ងៃទី១០ ខែមករា វិសាខាបានដាក់កីឡាករបរទេស២រូបគឺកីឡាករ Ezzejjari ជម្រើសដំបូង និងត្រូវបានប្តូរជំនួយដោយកីឡាករ Jonata នៅនាទី៦២ ប៉ុន្តែលទ្ធផល វិសាខា យកឈ្នះក្រុមខេត្តកំពង់ចាមត្រឹម ៣-១ ទាំងក្រុមខេត្តមួយនេះមិនមានកីឡាករបរទេស។

ទោះបីមិនទទួលបានលទ្ធផលមិនល្អមែន ប៉ុន្តែកីឡាកររបស់ក្រុមកំពង់ចាម អាចមានឱកាសបង្ហាញសមត្ថភាពនៅលើទីលានប្រកួតប្រជែងជាមួយកីឡាករបរទេស និងជាបទពិសោធថ្មីមួយសម្រាប់កីឡាករតាមបណ្តាខេត្ត។ សរុបមកការដាក់កីឡាករបរទេសឲ្យចូលរួមក្នុងការប្រកួតថ្នាក់ជាតិគឺជារឿងល្អ ជាការផ្ដល់ឱកាសឲ្យកីឡាករដែលកំពុងលេងលីគទី២និងលេងតាមខេត្តបានអភិវឌ្ឍខ្លួន៕