ឯកឧត្តម ឌី វិជ្ជា ជួយសម្រួលការព្យាបាល និងឧបត្ថម្ភ១ពាន់ដុល្លារដល់កីឡាករ ម៉ើល ចាន់រ៉ា របួស

ឯកឧត្តមឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្ដាលសន្តិសុខ​ បាន​ជួយ​សម្រួល​ដល់​ការ​សម្រាក​ព្យាបាល​​វះ​កាត់ និង​ឧបត្ថម្ភ​ថវិកា​១០០០​ដុល្លារ​បន្ថែម​ទៀត​ដល់​កីឡាករ ម៉ើល ចាន់រ៉ា របស់​ក្រុម​ខេត្តត្បូងឃ្មុំ ដែល​បាន​របួស​បាក់​ថ្គាម​ក្នុង​ការ​ប្រកួត​កន្លង​មក។

​នៅ​លើ​ផេកផ្លូវ​ការ ឯកឧត្តម ឌី វិជ្ជា បាន​រៀប​រាប់​ថា ៖«នា​រសៀលថ្ងៃសៅរ៍ ទី២៧ ខែមករា ឆ្នាំ២០២៤ ក្រុមការងារបាននាំយកថវិកាចំនួន១,០០០ដុល្លារ​ និងការសួរសុខទុក្ខរបស់ ខ្ញុំ និងភរិយា ដល់កីឡាករបាល់ទាត់ ម៉ើល ចាន់រ៉ា របស់ក្រុមបាល់ទាត់ មន្ទីរ អយក ខេត្តត្បូងឃ្មុំ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ដែលបានជួបឧប្បត្តិហេតុរបួសធ្ងន់ អំឡុងពេលប្រកួតក្នុងសប្តាហ៍នេះ នៃការប្រកួតពានរង្វាន់ សម្តេចអគ្គមហាសេនាបតីតេជោ ហ៊ុន សែន លើកទី១៧ ឆ្នាំ២០២៣-២០២៤។ ខ្ញុំ និងភរិយា សូមជូនពរកីឡាករ ម៉ើល ចាន់រ៉ា ឆាប់ជាសះស្បើយ»។

ជា​មួយ​គ្នា​នេះ សមាគមកីឡាបាល់ទាត់ខេត្តត្បូងឃ្មុំ បាន​ថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម ឌី វិជ្ជា ដែលបានផ្តាំផ្ញើសួរសុខទុក្ខតាមរយៈក្រុមការងារ និងឯកឧត្តមបានជួយសម្របសម្រួល ការសម្រាកព្យាបាលវះកាត់របួសបាក់ឆ្អឹងថ្គាម បន្ថែមលើសពីនេះ ឯកឧត្តមបានឧបត្ថម្ភថវិកា ១០០០ដុល្លារ ដល់កីឡាករ ម៉ើល ចាន់រ៉ា របស់ខេត្តត្បូងឃ្មុំ ដែលបានរបួសបាក់ថ្គាម ក្នុងការប្រកួតកន្លងមកនេះ។

សូម​បញ្ជាក់​ថា កីឡាករ ម៉ើល ចាន់រ៉ា ជា​ប្រធាន​ក្រុម​របស់​ខេត្ត​ត្បូងឃ្មុំ​បាន​របួស​បាក់​ថ្គាម​នៅ​ពេល​ប្រកួត​ជា​មួយ​ក្លិប​បាល់ទាត់​ភ្នំពេញ​ក្រោន កាល​ពី​ថ្ងៃ​ទីពុធ ទី​២៤ ខែ​មករា សម្រាប់​ការ​ប្រកួត​ជើង​ទី​២​ ពាន​រង្វាន់​សម្តេច​តេជោ ហ៊ុន សែន ថ្នាក់​ជាតិ លើក​ទី​១៧ ឆ្នាំ​២០២៣-២៤៕

អត្ថបទ៖ វីរបុត្រ