គុណផល​ទាំង​នេះ​​ធ្វើ​ឲ្យ​ ក្លិប​នៅ​អាស៊ាន​ ចាប់អារម្មណ៍ កីឡាករ គ្រូបង្វឹក​នៅ​កម្ពុជា

​គ្រូ​បង្វឹក និង​អ្នក​គាំទ្រ​នៅ​តំបន់​អាស៊ាន​បាន​កំពុង​ចាប់​អារម្មណ៍​ពី​កីឡាករ និងគ្រូ​បង្វឹក​​ដែល​ប្រកប​អាជីព​បាល់ទាត់​នៅ​ប្រទេស​កម្ពុជា បន្ទាប់​ពី​ក្លិប​តំណាង​កម្ពុជា​​បាន​បង្ហាញ​គុណផល​​ល្អ​គួរ​​ឲ្យកត់​សំគាល់នា​រយៈ​ពេល​ពីររដូវ​កាល​ចុង​ក្រោយ។

ក្លិប​បាល់ទាត់​កម្ពុជា​ធ្វើ​បាន​យ៉ាង​ល្អ​សម្រាប់​ការ​ប្រកួត​ក្នុង​ពាន​រង្វាន់​អាស៊ី។ ភ្នំពេញ​ក្រោន បាន​ឈាន​ដល់​វគ្គ​ពាក់​កណ្តាល​ផ្តាច់​ព្រ័ត្រ​ប្រចាំ​តំបន់​អាស៊ាន ក្នុង​ពាន​រង្វាន់ AFC Cup រដូវ​កាល​ ២០២៣-២៤។ ផ្តើម​ចេញ​ពី​ការ​ទទួល​បាន​ត្រឹម​តែ​២៥%ប៉ុណ្ណោះ​ក្នុង​វគ្គ​ជម្រុះ​ជុំ​ទី១​ ដោយ​បាន​យក​ឈ្នះ​ក្រុមឡាវ Young Elephants ដោយ​លទ្ធផល ៣-០ ដើម្បី​ទទួល​បាន​កន្លះ​កៅអី ឬ៥០​% បន្ត​ទៅ​ប្រកួត​ជម្រុះ​ជុំ​ទី​២​ជា​មួយ​ក្លិប​ខ្លាំង​របស់​ប្រទេស​សិង្ហបុរី។ ភ្នំពេញ​ក្រោន បាន​យក​ឈ្នះ Tampines Rovers ដោយ​លទ្ធផល ៣-២ នៅ​ទឹក​ដី​សិង្ហបុរី ទើប​ទទួល​បាន​១​កៅអី​ឡើង​ទៅ​វគ្គសន្សំពិន្ទុ​ក្នុង​ពូល។

នៅ​វគ្គ​សន្សំពិន្ទុ​ក្នុង​ពូល ភ្នំពេញ​ក្រោន បាន​បង្ក​ព្យុះ​ភ្លៀង​បន្ថែម​ទៀត​ដោយ​បាន​យក​ឈ្នះក្រុម​ហ្វីលីពីន​ Dynamic Her Cebu ទាំង​ពីរ​ជើង ៧-០, ឈ្នះ​ក្រុម​មីយ៉ាន់ម៉ា Shan United ទាំង​ពីរ​ជើង ៥-២ និង​ឈ្នះ​ក្រុម​អូស្ត្រាលី Macarthur ៣-០ ក្នុង​ជើង​ទី១ ប៉ុន្តែ​ចាញ់ ០-៥ ក្នុង​ជើង​ទី​២ ដើម្បី​បាន​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ​ប្រចាំ​តំបន់​អាស៊ាន ដោយ​ចាញ់​ក្រុមអូស្ត្រាលី Central Coast Mariners ដោយ​លទ្ធផល ០-៤។

ឈាន​ចូល​រដូវ​កាល​ ២០២៤-២៥ ក្លិប​ព្រះ​ខ័ន​រាជ​ស្វាយរៀង រឹត​តែ​ធ្វើ​បាន​ល្អ​ថែម​ទាំង​ក្នុង​ពាន​រង្វាន់ AFC Challenge League។ ក្នុង​ពាន​រង្វាន់​នេះ មាន​ការ​ប្រកួត​នៅ​ក្នុង​តំបន់​អាស៊ី​ខាង​កើត ហើយ ព្រះ​ខ័ន​រាជ​ស្វាយរៀង បាន​យក​ឈ្នះ​ក្រុមម៉ុងហ្គោលី SP Falcons វគ្គសន្សំពិន្ទុ​ក្នុង​ពូល, ឈ្នះ​ក្រុម Shan United វគ្គ៨​ក្រុម​ចុង​ក្រោយ និង​ឈ្នះ​ក្រុម​ឥណ្ឌូណេស៊ី Madura United វគ្គ​ពាក់​កណ្តាល​ផ្តាច់​ព្រ័ត្រ ដើម្បី​ឈាន​ដល់​វគ្គ​ផ្តាច់​ព្រ័ត្រ ដែល​បាន​ចាញ់​ក្រុម​តួកមេនីស្ថាន FK Arkadag ប៉ុន្តែ​បង្ហាញ​ទម្រង់​លេង​គួរ​ឲ្យ​ចាប់​អារម្មណ៍។

តាម​រយៈ​ការ​បង្ហាញ​សមត្ថភាព​ដ៏​ល្អ​របស់​ក្រុម​កម្ពុជា​ក្នុង​ពីរ​រដូវ​កាល​ចុង​ក្រោយ និង​ក្រោម​ការ​ដឹក​នាំ​ដ៏​​មាន​ទេពកោសល្យ​របស់គ្រូ​បង្វឹក​បាន​ទាក់​​ទាញ​ភ្នែក​​​ថ្នាក់​ដឹក​នាំក្លិប និង​អ្នក​គាំទ្រ​នៅ​ក្រៅ​ប្រទេស​ជា​ពិសេស​នៅ​តំបន់​​អាស៊ាន។

បន្ទាប់​ពី​ចប់​រដូវ​កាល​ ២០២៤-២៥​ភ្លាម ឃើញ​មាន​ព័ត៌មាន​ជា​ច្រើន​និយាយ​ពី​ក្លិប​នៅ​ប្រទេស​ថៃ និង​ឥណ្ឌូណេស៊ី​បាន​ចាប់​អារម្មណ៍​លើ​កីឡាករ និង​គ្រូ​បង្វឹក​ដែល​ប្រកប​អាជីព​នៅ​កម្ពុជា។ ជាក់​ស្តែង លោក​គ្រូ  Pep Muñoz បាន​ដឹក​នាំ​ក្លិប​ព្រះ​ខ័ន​រាជ​ស្វាយរៀង​ទទួល​បាន​ជោគជ័យ​បំផុត​ទាំង​ក្នុង​ស្រុក និង​ក្រៅ​ស្រុក។ លោក​បាន​បង្កើត​ស្ថិតិ​ដ៏​ល្អ​​ឥត​ខ្ចោះ​សម្រាប់​ព្រះ​ខ័ន​រាជ​ស្វាយរៀង ដោយ​បាន​ឈ្នះ​ពាន​រង្វាន់​៤​ហើយ​ក្នុង​ពីរ​រដូវ​កាល។ លោក​ក៏​បាន​សម្រេច​ចាក​ចេញ​ពី​ក្លិប​កម្ពុជា។ ការ​ចាក​ចេញ​នេះ លោក​ទំនង​ជា​ទទួល​បាន​ឱកាស​ធំ​នៅ​ក្រៅ​ប្រទេស ក្នុង​នោះ​រាប់​បញ្ចូល​ទាំង​ក្លិប​នៅ​តំបន់​អាស៊ាន​ផងដែរ។

ទន្ទឹម​ជា​មួយ​គ្នា​នេះ កីឡាករ​​ដែលលេង​នៅ​កម្ពុជា​ជា​ច្រើន​​​ត្រូវ​បាន​ក្លិប​ក្រៅ​ប្រទេស​ចាប់​អារម្មណ៍​ដូច​ជា​ខ្សែ​បម្រើ​ការពារ Nick Taylor, ខ្សែ​ប្រយុទ្ធ​សញ្ជាតិ​កម្ពុជា Andres Neito, ខ្សែ​បម្រើ Yudai Ogawa និង​ខ្សែ​ការពារសញ្ជាតិ​ខ្មែរ Takaki Ose ជា​ដើម។

មិន​មែន​ជា​រឿង​ចៃដន្យ​ទេ​ដែល​ក្លិប​នៅ​ក្រៅ​ប្រទេស​ចាប់​អារម្មណ៍​ចង់​បាន​កីឡាករ និង​គ្រូ​បង្វឹក​នៅ​លីគ​កម្ពុជា​ ប៉ុន្តែ​​កើត​ចេញ​ពី​ការ​​បង្ហាញ​សមត្ថភាព​របស់​ក្លិប​នៅ​លើ​ឆាក​អន្តរជាតិ​ ព្រម​ទាំង​​ការ​ប្រកួត​អន្តរជាតិ​របស់​ក្រុម​បាល់ទាត់​ជម្រើស​ជាតិ​កម្ពុជា​មួយ​រយៈ​ពេល​ចុង​ក្រោយ។ ជា​ពិសេស​ក្លិប​បាល់ទាត់​នៃ​លីគ​កំពូល​កម្ពុជា​បាន​ឡើង​ដល់​ចំណាត់​ថ្នាក់​លេខ​២៣​ក្នុង​ចំណោម​៤៧ប្រទេស​​នៅ​អាស៊ី និង​ចំណាត់​ថ្នាក់​លេខ​១០​នៅ​តំបន់​អាស៊ី​ខាង​កើត ហើយ​ស្ថិត​​នៅ​លើ​ប្រទេស​អាស៊ាន​ជា​ច្រើន៕​

អត្ថបទ៖ វីរបុត្រ