Charlie Scott មើលឃើញលីគកម្ពុជា កំពុង​ដើរ​លើ​ផ្លូវ​ដ៏​ត្រឹម​ត្រូវ​ ដោយសារកត្តា​ទាំងនេះ

ខ្សែបម្រើរបស់ បឹងកេត កីឡាករ Charlie Scott បានបង្ហាញការកោតសរសើរ និងមើលឃើញពីសក្តានុពលរបស់លីគបាល់ទាត់ កម្ពុជា ជាច្រើន បន្ទាប់ពីលេងនៅទីនេះបានរយៈពេលកន្លះរដូវកាល។

អតីតយុវជនរបស់ Manchester United ដែលបច្ចុប្បន្នមានវ័យ ២៧ ឆ្នាំរូបនេះ ត្រូវបាន បឹងកេត ចុះកុងត្រាយកបានពីក្លិប ឥណ្ឌូណេស៊ី​ Semen Padang កាលពីទីផ្សារដោះដូរកីឡាករ ខែ មករា ឆ្នាំ ២០២៥។ យ៉ាងណា ចំពោះការលេងនៅទីនេះកន្លះរដូវកាលកន្លងមក Scott បានបង្ហាញការភ្ញាក់ផ្អើលយ៉ាងខ្លាំងអំពីលីគបាល់ទាត់កម្ពុជា ដោយរូបគេបានចាត់ទុកលីគ កម្ពុជា ជាលីគដ៏មានសក្តានុពលមួយ ដោយសារទីនេះមានក្រុមល្អៗច្រើន កីឡាករក៏ល្អៗច្រើនទាំងខ្មែរ និងបរទេស និងកីឡដ្ឋានរបស់ក្លិបនីមួយៗវិញក៏មានភាពប្រសើរផងដែរ។

ថ្លែងប្រាប់សារព័ត៌មាន «កម្ពុជាថ្មី» នៅក្នុងបទសម្ភាស​មួយ​នេះ ខ្សែបម្រើសញ្ជាតិ អង់គ្លេស បានលើកឡើយយ៉ាងដូច្នេះថា៖ «ខ្ញុំមានអារម្មណ៍ថា Cambodian Premier League គឺបានរីកចម្រើនយ៉ាងពិតប្រាកដ។ ទីនេះមានក្រុមល្អៗច្រើន គ្រឿបរិក្ខារផ្សេងៗក៏ល្អ ហើយចំណែកកីឡដ្ឋានក៏ល្អផងដែរ។ ខ្ញុំដឹងថា មានក្រុមមួយចំនួនកំពុង​តែ​សាង​​សង់​កីឡដ្ឋានសម្រាប់ពេលអនាគត។ សម្រាប់កីឡាករ គឺល្អៗច្រើន ទាំងកីឡាករជាតិ និងកីឡាករបរទេស។ ខ្ញុំដឹងតែមួយគត់ គឺថាលីគកំពុងតែរីកចម្រើនទៅមុខជាបន្តបន្ទាប់»។

បន្ថែមពីនេះទៀត Scott បានលើកយក ក្លិបព្រះខ័នរាជស្វាយរៀង ដែលបានឡើងទៅវគ្គផ្តាច់ព្រ័ត្រពាន AFC Challenge League មកធ្វើជាឧទាហរណ៍បញ្ជាក់អំពីការរីកចម្រើននៃលីគបាល់ទាត់ កម្ពុជា។ កីឡាករ​បានបន្តថា៖ «អ្នកអាចឃើញនៅរដូវកាលនេះហើយ គឺព្រះខ័នរាជស្វាយរៀង បានធ្វើយ៉ាងល្អនៅក្នុងពាន AFC Challenge League ហើយពួកគេបានឈានដល់វគ្គផ្តាច់ព្រ័ត្រថែមទៀត ខណៈ​ចំណុចនេះហើយ គឺបានបំផុសបំផុលបាល់ទាត់កម្ពុជាឱ្យកាន់តែមានការចាប់អារម្មណ៍យ៉ាងខ្លាំង។ ជាមួយគ្នានេះផងដែរ អ្នកគាំទ្រផ្ទាល់នៅកីឡដ្ឋានក៏កាន់តែល្អប្រសើរឡើង…»។

គួរឱ្យដឹងថា Scott បានបង្ហាញសមត្ថភាពគួរឱ្យចាប់អារម្មណ៍មែនទែន ជាមួយ បឹងកេត ក្នុងរយៈពេលកន្លះរដូវកាលមកនេះ ខណៈការមកដល់របស់គេ គឺបានរួមចំណែកយ៉ាងធំ ក្នុងការជួយឱ្យក្លិបម្ចាស់ជើងឯកលីគកំពូលកម្ពុជា ៤ សម័យ បញ្ចប់រដូវកាល ២០២៤-២០២៥ ដោយឈរនៅចំណាត់ថ្នាក់ក្រុមកំពូលទាំង ៤ ប្រចាំលីគ និងដណ្តើមបានចំណាត់ថ្នាក់លេខ ៣ ក្នុងពានសម្តេចតេជោ ហ៊ុន សែន៕

អត្ថបទ៖ សេម កុសល