ស្ត្រីនគរបាលម្នាក់បាត់បង់ជីវិតពេលចុះបំពេញការងារតាមការិយាល័យបោះឆ្នោត​ ដោយសារក្រឡាប់រថយន្ដ

ស្រ្តីជាមន្រ្តីនគរបាលប៉ុស្ដិ៍រដ្ឋបាលលក្របៅ នៃអធិការដ្ឋាននគរបាលស្រុកកំចាយមារ រួមជាមួយប្អូនប្រុសបង្កើត ត្រូវបានបាត់បង់ជីវិតពេលបញ្ជូនទៅមន្ទីរពេទ្យ ក្នុងករណីគ្រោះថ្នាក់ចរាចរណ៍ក្រឡាប់រថយន្ដធ្លាក់ចូលប្រឡាយ។

ករណីគ្រោះថ្នាក់ចរាចរណ៍បណ្ដាលឲ្យបាត់បង់មន្ត្រីនគរបាលរូបនេះ បានកើតឡើងកាលពីវេលាម៉ោង១៤និង៤១នាទី ថ្ងៃទី៥ ខែមិថុនា ឆ្នាំ២០២២ នៅចំណុចភូមិសំបូ ឃុំជាច ស្រុកកំចាយមារ ខេត្តព្រៃវែ។

អធិការនគរបាលស្រុកកំចាយមារ ប្រាប់បានឲ្យដឹងថា ស្រ្តីរងគ្រោះមានឈ្មោះ សួង សុភាក់ អាយុ២៨ឆ្នាំ រស់នៅភូមិអណ្ដូងស្អាត ឃុំក្របៅ ស្រុកកំចាយមារ ជាមន្រ្តីនគរបាលជាតិ នៅប៉ុស្ដិ៍រដ្ឋបាលក្របៅ នៃអធិការដ្ឋាននគរបាលស្រុកកំចាយមារ និងប្អូនប្រុសឈ្មោះ សួង វិសាល អាយុ១៥ឆ្នាំ។

លោកអធិការបានបញ្ជាក់ថា គ្រោះថ្នាក់ចរាចរណ៍នេះ កើតឡើងពេលជនរងគ្រោះកំពុងចុះទៅបំពេញបេសកម្មយាមការិយាល័យបោះឆ្នោតលេខ០១៦១។ លោកបញ្ជាក់បន្ថែមថា ជនរងគ្រោះទាំងពីរនាក់ត្រូវបានប្រជាពលរដ្ឋ និងសមត្ថកិច្ចជួយសង្គ្រោះបន្ទាន់ តែមិនអាចជួយបាន ពោលគឺបានស្លាប់ពេលបញ្ជូនទៅកាន់មន្ទីរពេទ្យ៕

អត្ថបទ៖ សុខុម