កីឡា

ដៃប៉ះសេ Nizar Zulfika មានប្រវត្តិឈ្នះពានជាច្រើន មុនពេលចូលបញ្ជាការដ្ឋានអង្គរក្ស

បានផុស

១ ម៉ោង មុន

នៅ

ថ្ងៃសុក្រ ១៩ មិថុនា ២០២៦

ដោយ

ក្លិបបាល់ទះបញ្ជាការដ្ឋានអង្គរក្ស ទើបតែប្រកាសនាំចូលដៃប៉ះសេថ្មីសញ្ជាតិឥណ្ឌូណេស៊ី គឺកីឡាករ Nizar Zulfika ដើម្បីការពារតំណែងជើងឯកឆ្នាំចាស់របស់ខ្លួនក្នុងព្រឹត្តិការណ៍បាល់ទះតេជោលីគ រដូវកាលទី៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Nizar Zulfika អាយុ ៣១ ឆ្នាំ កម្ពស់ ១.៨៤ ម៉ែត្រ បានក្លាយជាកីឡាករឥណ្ឌូណេស៊ីទី៥ ដែលបានចូលរួមជាមួយ បញ្ជាការដ្ឋានអង្គរក្ស ក្នុងពានតេជោលីគ រដូវកាលនេះ បន្ទាប់ពីស្មាត់ស្តាំ Luvi Fedrian, ស្មាត់ស្តាំ Ageng Wardoyo, ស្មាត់ឆ្វេង Dims Saputra និងដៃប៉ះសេ Setiawan Fahril។ ការនាំចូលកីឡាករថ្មី ២ នាក់ចុងក្រោយសុទ្ធតែជាអតីតកីឡាករជម្រើសជាតិឥណ្ឌូណេស៊ី គឺ Nizar Zulfika និង Dims Saputra។

មុនមកចូលរួមជាមួយ បញ្ជាការដ្ឋានអង្គរក្ស កីឡាករ Nizar Zulfika មានបទពិសោធជាច្រើនទាំងក្លិប និងជម្រើសជាតិឥណ្ឌូណេស៊ី។ រហូតដល់ពេលនេះ រូបគេបានឆ្លងកាត់លេងឲ្យក្លិប ៨ ផ្សេងគ្នា ក្នុងនោះលេងឲ្យក្លិបនៅលីគឥណ្ឌូណេស៊ីចំនួន ៧ ក្លិប និងនៅសៀម១ក្លិប។

បើនិយាយពីសមិទ្ធផលវិញ កីឡាករ Nizar Zulfika បានជួយឲ្យក្រុមបាល់ទះជម្រើសជាតិឥណ្ឌូណេស៊ី ឈ្នះមេដាយមាស កីឡាស៊ីហ្គេម ៣ លើកជាប់គ្នាគឺឆ្នាំ ២០១៩ ២០២២ និង ២០២៣ នៅប្រទេសកម្ពុជា។

សម្រាប់ក្លិប រូបគេបានឲ្យឈ្នះជើងឯក AVC Champions League មួយលើក នៅរដូវកាល២០២៥-២៦ និង ចំណាត់ថ្នាក់លេខ២ មួយលើក ព្រមទាំងចំណាត់ថ្នាក់លេខ៣ មួយលើក។ រូបគេបានជួយក្លិបឈ្នះជើងឯកលីគបាល់ទះកំពូលឥណ្ឌូណេស៊ី ៦ លើក ចំណាត់ថ្នាក់លេខ ២ បួនលើក និងចំណាត់ថ្នាក់លេខ ៣ បីលើក ព្រមទាំងជួយក្លិបទទួលបានចំណាត់ថ្នាក់លេខ ២ នៅលីគបាល់ទះកំពូលថៃ ១ លើក។

ចំពោះពានឯកត្តជន កីឡាករ Nizar Zulfika ធ្លាប់ឈ្នះពានអ្នកប៉ះសេល្អបំផុត ២ លើកគឺនៅលីគបាល់ទះកំពូលឥណ្ឌូណេស៊ី រដូវកាល ២០១៦-១៧ និងរដូវកាល ២០២១-២២។

កីឡាករ Nizar Zulfika ជាដៃប៉ះឥណ្ឌូណេស៊ីទី២ ដែលបានចូលរួមជាមួយ បញ្ជាការដ្ឋានអង្គរក្ស ក្នុងតេជោលីគ រដូវកាលនេះ បន្ទាប់ពីដៃប៉ះសេទី១ កីឡាករ Setiawan Fahril ដែលបានលេងតាំងពីជុំទី១។

ក្រុមបញ្ជាការដ្ឋានអង្គរក្ស បានដាក់គោលដៅឈ្នះជើងឯកតេជោលីគ ៣ រដូវកាលជាប់គ្នា តាមរយៈការពង្រឹងក្រុមដែលមានកីឡាករឥណ្ឌូណេស៊ីរហូតដល់ ៥ នាក់ ក្រោមការដឹកនាំរបស់គ្រូបង្វឹកដ៏ល្អសញ្ជាតិឥណ្ឌូណេស៊ីគឺលោក Indra។ ទោះបីជាយ៉ាងណា នៅជុំទី ២ នេះមិនមែនជាការងាយស្រួលដូចពីររដូវកាលមុនទេ ដោយសារក្លិបបាល់ទះ វិសាខា មានកីឡាករបរទេស ៥ នាក់ និង ស្នងការខេត្តស្វាយរៀង មានកីឡាករបរទេស ៣ នាក់ ដែលបានពង្រឹងក្រុមដ៏គួរឲ្យភ្ញាក់ផ្អើល៕