ព័ត៌មានជាតិ

អ្នកនាំពាក្យស្នងការរាជធានី ៖ ឆន្ទៈសមត្ថកិច្ច គឺផ្ដល់ភាពយុត្តិធម៌សម្រាប់ជនរងគ្រោះ

បានផុស

២ years មុន

នៅ

ថ្ងៃសុក្រ ១២ មករា ២០២៤

ដោយ

លោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានសង្កត់ធ្ងន់ថា ឆន្ទៈរបស់សមត្ថកិច្ច គឺត្រូវតែធ្វើ ត្រូវតែអនុវត្តច្បាប់ដ៏ម៉ឺងម៉ាត់ និងយកចិត្តទុកដាក់គ្រប់បទល្មើសទាំងអស់ ដោយផ្ដល់ភាពយុត្តិធម៌សម្រាប់ជនរងគ្រោះ។

ការសង្កត់ធ្ងន់នេះ ខណៈ លោកវរសេនីយ៍ឯក សំ វិច្ឆិកា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានជួបសម្ភាសន៍ជាមួយ កម្ពុជាថ្មី នៅក្នុងកិច្ចពិភាក្សា ក្រោមប្រធានបទ «វិធានការកាត់បន្ថយករណីគ្រោះថ្នាក់ចរាចរណ៍ នៅរាជធានីភ្នំពេញ» កាលពីថ្ងៃទី ៤ ខែមករា ឆ្នាំ ២០២៤ កន្លងទៅ។

ឆ្លើយតបចំពោះករណីក្នុងបណ្ដាញសង្គមហ្វេសប៊ុកដែលតែងតែធ្វើការរិះគន់លើសមត្ថកិច្ចជំនាញថា ហេតុអ្វីបានជាធ្វើការងារយឺតយ៉ាវម្ល៉េះ? លោកវរសេនីយ៍ឯក សំ វិច្ឆិកា បានលើកឡើងថា ពេលខ្លះកិច្ចការងារ គឺត្រូវការពេលវេលា និងស្រាវជ្រាវឲ្យបានដិតដល់។ លោកសង្កត់ធ្ងន់ថា «ឆន្ទៈរបស់សមត្ថកិច្ច គឺត្រូវតែធ្វើ ត្រូវតែអនុវត្តច្បាប់ដ៏ម៉ឺងម៉ាត់ នៅពេលបទល្មើសកើតឡើង គឺយើងត្រូវតែធ្វើ មិនមែនបណ្ដែតបណ្ដោយ មិនមែនគ្មានការយកចិត្តទុកដាក់ទេ គឺ យើងយកចិត្តទុកដាក់គ្រប់បទល្មើសទាំងអស់»។

លោកវរសេនីយ៍ឯក សំ វិច្ឆិកា លើកឡើងថា ការឆ្លើយតបខាងលើនេះជាសារមួយជម្រាបជូនដល់ប្រជាពលរដ្ឋ ដើម្បីឲ្យពួកគាត់បានយល់អំពីកិច្ចការងាររបស់សមត្ថកិច្ច។ ចំពោះពេលខ្លះប្រជាពលរដ្ឋបានប្រើពាក្យមួយថា «អរគុណហ្វេសប៊ុក ដែលបានធ្វើការផ្សព្វផ្សាយឲ្យសមត្ថកិច្ចឈានទៅដល់ការបង្ការទប់ស្កាត់ ហើយចាប់ឃាត់ខ្លួនជនបង្កយកមកអនុវត្តច្បាប់» គឺ មិនមែនទេ ហើយអ្វីដែលសមត្ថកិច្ចបានធ្វើ គឺធ្វើតាមវិធានការ ហៅថា ការអំពាវនាវ និងវិធានការច្បាប់ទៅជាមួយគ្នា។

លោក សំ វិច្ឆិកា ក៏បានបញ្ជាក់ដែរថា «អញ្ចឹងនេះជាការជម្រាបជូនទៅដល់មហាជនឲ្យបានយល់អំពីកិច្ចការងាររបស់សមត្ថកិច្ចដែលយើងគ្រប់គ្នាទាំងអស់តែងតែបានប្ដេជ្ញាចិត្តដូចគ្នា គឺថាភាពយុត្តិធម៌សម្រាប់ជនរងគ្រោះ គឺយើងត្រូវតែរកឲ្យគាត់»៕

អត្ថបទ ៖ ពិសី