លោកម៉ាឌូរ៉ូ ស្វែងរកជំនួយផ្នែកយោធាពី​រុស្ស៊ី ខណៈអាមេរិកបង្កើនកម្លាំងនៅការីប៊ីន

ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ បានស្នើសុំជំនួយយោធាពី​សមភាគី​រុស្ស៊ី លោក វ៉្លាឌីមៀរ ពូទីន ដើម្បីពង្រឹងការការពាររបស់ប្រទេស ចំពេលមានការកសាងយោធារបស់សហរដ្ឋអាមេរិក​រឹត​តែ​ខ្លាំង​នៅតំបន់ការ៉ាប៊ីន។ នេះ​បើយោង​តាម​សេចក្ដី​រាយការណ៍​នៅ​លើ​កាសែត Washington Post កាល​ពី​ថ្ងៃសុក្រ​ទី​៣១​តុលា ដោយដកស្រង់ឯកសារផ្ទៃក្នុងរបស់រដ្ឋាភិបាលអាមេរិក។

យោងតាមរបាយការណ៍ លោក​ម៉ាឌូរ៉ូ បានស្នើ​ឲ្យ​ទីក្រុងមូស្គូ ជួយ​ពង្រឹងប្រព័ន្ធការពារដែនអាកាសរបស់វ៉េណេស៊ុយអេឡា ដោយការដាក់​ពង្រាយ​ប្រព័ន្ធ​​​មីស៊ីលចំនួន​១៤គ្រឿង និង​​ជួសជុល​យន្តហោះចម្បាំង Sukhoi Su-30MK2 ដែលផលិតដោយរុស្ស៊ី ដែលកាលពីមុនទិញដោយវ៉េណេស៊ុយអេឡា។ ឯកសារ​នោះ​បាន​​បញ្ជាក់​ថា សំណើ​នេះ​ក៏​រួម​បញ្ចូល​ទាំង​ការ​ជួសជុល​ម៉ាស៊ីន​ចំនួន​​៨​គ្រឿង រ៉ាដា​៥​គ្រាប់ និងជំនួយ​ផ្នែក​ភ័ស្តុភារ។

ការអំពាវនាវជាលាយលក្ខណ៍អក្សររបស់លោក​ម៉ាឌូរ៉ូ ទៅកាន់លោកពូទីន ត្រូវបានគេរាយការណ៍ថា ធ្វើឡើងដោយរដ្ឋមន្ត្រីដឹកជញ្ជូនវ៉េណេស៊ុយអេឡា លោក Ramón Celestino Velásquez ក្នុងអំឡុងដំណើរទស្សនកិច្ច​កាល​ពី​ពាក់កណ្តាលខែតុលាទៅកាន់ទីក្រុងមូស្គូ ជាកន្លែងដែលលោកបានជួបជាមួយសមភាគីរុស្ស៊ី។ នៅក្នុង​​លិខិត​​នោះ លោកម៉ាឌូរ៉ូ បានពណ៌នាយន្តហោះ Su-30 ថាជា«ការរារាំងដ៏សំខាន់បំផុត ដែលរដ្ឋាភិបាលជាតិវ៉េណេស៊ុយអេឡាមាននៅពេលប្រឈមមុខនឹងការគំរាមកំហែងនៃសង្គ្រាម»។

មេដឹកនាំវ៉េណេស៊ុយអេឡាក៏បានស្វែងរក​ផែនការហិរញ្ញប្បទានរយៈពេលមធ្យម​៣​ឆ្នាំ តាមរយៈក្រុមហ៊ុនការពារជាតិរបស់រុស្ស៊ី Rostec ទោះបីជាមិនមានការលើកឡើងអំពីចំនួនជាក់លាក់ក៏ដោយ។

វានៅតែមិនច្បាស់ថាតើទីក្រុងមូស្គូបានឆ្លើយតបទៅនឹងសំណើនេះឬយ៉ាងណា។ នេះ​បើ​តាម​ការកត់​សម្គាល់​របស់​កាសែត Washington Post។

វ៉េណេស៊ុយអេឡា ដែលជាសម្ព័ន្ធមិត្តជិតស្និទ្ធបំផុតរបស់រុស្ស៊ីនៅអាមេរិកឡាទីន បានធ្វើ​ឲ្យ​ទំនាក់ទំនងយោធា និងសេដ្ឋកិច្ចកាន់តែស៊ីជម្រៅជាមួយទីក្រុងមូស្គូ ចាប់តាំងពីសម័យមេដឹកនាំសង្គមនិយម​របស់​អតីត​មេ​ដឹកនាំHugo Chávez។ កាល​ពី​ដើម​ឆ្នាំ​​២០២៥​នេះ លោកពូទីន និង​លោក​ម៉ាឌូរ៉ូ បានចុះហត្ថលេខាលើ​សន្ធិសញ្ញាភាពជាដៃគូយុទ្ធសាស្ត្រ នៅទីក្រុងមូស្គូ ដែលជាផ្នែកនៃកិច្ចខិតខំប្រឹងប្រែងរបស់រុស្ស៊ីក្នុងការពង្រីកសម្ព័ន្ធភាព ចំពេលមានសង្រ្គាមដែលកំពុងបន្តនៅក្នុងប្រទេសអ៊ុយក្រែន៕

ដោយ៖ ឈាង