លោក ត្រាំ ថា អ៊ីរ៉ង់ចាប់ផ្តើមម៉ឺងម៉ាត់ក្នុងការចរចា ខណៈអាមេរិក កំពុងពិភាក្សាគម្រោងវាយប្រហារធំ

ប្រធានាធិបតីអាមេរិក ដូណាល់ ត្រាំ បានថ្លែងកាលពីថ្ងៃ ទី២៤ ខែកក្កដា ថា លោកមិនទាន់បានសម្រេចចិត្តថា តើត្រូវបើកការវាយប្រហារទ្រង់ទ្រាយធំលើអ៊ីរ៉ង់នៅឡើយទេ ខណៈដែលទីក្រុងតេហេរ៉ង់នៅពេលនេះកំពុងបង្ហាញជំហរ «ម៉ឺងម៉ាត់ខ្លាំង» នៅក្នុងការចរចាជាមួយទីក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពី Reuters, លោក ត្រាំ បានប្រាប់ក្រុមអ្នកកាសែតនៅក្នុងការិយាល័យ Oval Office នៅពេលត្រូវបានសួរថា តើលោកបានធ្វើការសម្រេចចិត្តហើយឬនៅ បន្ទាប់ពីមានសេចក្តីរាយការណ៍ថា លោកកំពុងជួបពិភាក្សាជាមួយក្រុមប្រឹក្សាដើម្បីពិភាក្សាអំពីប្រតិបត្តិការទ្រង់ទ្រាយធំមួយ ដោយលោកឆ្លើយតបថា «ទេ ខ្ញុំមិនទាន់បានសម្រេចចិត្តទេ»។

លោកបានបន្ថែមថា «មើលចុះ យើងកំពុងជជែកពិភាក្សាជាមួយពួកគេនៅពេលនេះ។ ខ្ញុំគិតថាពួកគេកំពុងកាន់តែមានភាពម៉ឺងម៉ាត់ឡើងៗពីមួយថ្ងៃទៅមួយថ្ងៃ ដោយសារតែមូលហេតុដែលមើលឃើញច្បាស់ស្តែង»។

មិនតែប៉ុណ្ណោះ លោក ត្រាំ ខ្លួនឯងបានកត់សម្គាល់ឃើញថា ភាគីអ៊ីរ៉ង់ចាប់ផ្តើមបង្ហាញឥរិយាបថម៉ឺងម៉ាត់និងហ្មត់ចត់ខ្លាំង ក្នុងការជជែកពិភាក្សាជាមួយវ៉ាស៊ីនតោន ដែលខុសពីពេលមុនៗដែលអ៊ីរ៉ង់តែងតែប្រើពាក្យសម្តីឌឺដង ឬគំរាមកំហែងត្រឡប់មកវិញ។ គិតត្រឹមពេលនេះ ប្រធានាធិបតីអាមេរិករក្សាជំហរ មិនទាន់បញ្ជាឲ្យបើកការវាយប្រហារធំនៅឡើយទេ ដើម្បីទុកឱកាសឲ្យផ្លូវការទូតដំណើរការ។

គួរបញ្ចាក់ដែរថា យោធាអាមេរិកទើបតែបានបញ្ចប់ការបើកប្រតិបត្តិការទម្លាក់គ្រាប់បែកតាមអាកាស ១៣យប់ជាប់ៗគ្នា ទៅលើហេដ្ឋារចនាសម្ព័ន្ធយោធា និងប្រព័ន្ធមីស៊ីលរបស់អ៊ីរ៉ង់។ ការវាយប្រហារឥតស្រាកស្រាន្តពីអាមេរិក និងការឡោមព័ទ្ធសេដ្ឋកិច្ច បានធ្វើឲ្យមេដឹកនាំអ៊ីរ៉ង់ដឹងខ្លួនថា ពួកគេមិនអាចទប់ទល់នឹងសមត្ថភាពយោធារបស់សម្ព័ន្ធមិត្តអូសបន្លាយពេលវែងទៀតបានទេ៕

អត្ថបទ ៖ សាង ស្រីល័ក្ខ

ក្រុមហេសបូឡា ឌឺដងឲ្យប្រធានាធិបតីលីបង់​ ថា ទៅជួបអាមេរិក ប្រៀបដូចការចុះញ៉មនឹងបរទេស