គ្រូ Koji និង គឹមហ៊ុយ លើកឡើងដូចគ្នា ថា បាត់កីឡាករសំខាន់មួយចំនួន មិនជាបញ្ហាទេសម្រាប់ក្រុម

គ្រូបង្វឹករបស់ក្រុមជម្រើសជាតិ កម្ពុជា លោក Koji Gyotoku និងអ្នកចាំទី ហ៊ុល គឹមហ៊ុយ បានលើកឡើងដូចគ្នា មុនជួបក្រុមជម្រើសជាតិ សិង្ហបុរី នៅទឹកដីរបស់​ខ្លួនវេលា​ម៉ោង ៧ យប់​នេះ​ ពីការអវត្តមានកីឡាករសំខាន់ៗមួយចំនួនធំនៅក្នុងក្រុម ប៉ុន្តែតាមការលើកឡើងរបស់អ្នកទាំង ២ គឺចំណុចនេះ នឹងមិនក្លាយជាបញ្ហាចោទសម្រាប់ក្រុមគោព្រៃនោះទេ។

ក្រុមជម្រើសជាតិ កម្ពុជា បានអវត្តមានកីឡាករសំខាន់ៗជាច្រើន ដូចជា Takaki Ose, សារ៉េត គ្រីយ៉ា, ញាន សូស៊ីដាន់, វីរះ ដារ៉ា, សឿយ វិសាល, ស រតនា, អ៊ុក សុវណ្ណ និង Andres Nieto ជាដើម។ កត្តានៃការអវត្តមានកីឡាករទាំងនោះ គឺត្រូវបានគេទម្លាយ ថា មកពីក្លិបមិនអនុញ្ញាតឱ្យមកចូលរួម ដោយសារតែពេលវេលាប្រកួត ចំពេលក្លិបនីមួយៗកំពុងមមាញឹកក្នុងការត្រៀមខ្លួនសម្រាប់រដូវកាលថ្មី។

ទោះបីជាយ៉ាងណា គ្រូបង្គោលលោក Koji បានលើកឡើងត្រង់ៗ ថា ចំណុចនេះមិនសូវជាបញ្ហាសម្រាប់លោកនោះទេ ដោយលោកមានកីឡាករប៉ុន្មាន នឹងប្រើប៉ុណ្ណឹងឱ្យអស់ពីសមត្ថភាព។ គ្រូបង្គោលសញ្ជាតិ ជប៉ុន បានថ្លែងនៅក្នុងសន្និសីទសារព័ត៌មាន ថា៖ «ដូចយើងដឹងហើយ គឺមានកីឡាករមួយចំនួន ដែលមិនបានមកចូលរួមជាមួយក្រុម។ សម្រាប់ខ្ញុំមិនសូវជាបញ្ហាសម្រាប់ក្រុមទេ។ យើងមានកីឡាករមកចូលរួមប៉ុន្មាន នឹងព្យាយាមហាត់ប៉ុណ្ណឹង ហើយលេងឱ្យអស់ពីសមត្ថភាពនូវចំនួនកីឡាករដែលមាន»។

ចំណែកហ៊ុល គឹមហ៊ុយវិញបានលើកឡើងស្រដៀងគ្នាដូចនេះដែរ ថា៖ «សម្រាប់ក្រុមយើងរៀបចំបានល្អ។ ដូចដែលយើងបានដឹងអ៊ីចឹង គឺយើងមិនចង់និយាយពីអ្វីដែលយើងមិនមានទេ។ យើងនឹងនិយាយអំពីអ្វី ដែលយើងមាន។ យើងមានប៉ុណ្ណា យើងនឹងរៀបចំប្រឹងប្រែងឱ្យអស់ពីសមត្ថភាព»។

គួរបញ្ជាក់ជាថ្មី ថា ក្រុមជម្រើសជាតិ កម្ពុជា នឹងបើកទ្វាពហុកីឡដ្ឋានជាតិមរតកតេជោ ទទួលស្វាគមន៍ក្រុម សិង្ហបុរី នាវេលាម៉ោង ៧ ល្ងាចថ្ងៃទី ២៤ ខែ កក្កដា ឆ្នាំ ២០២៦ នេះ ដែលជាជំនួបបើកឆាកក្នុងពូល A នៃពានរង្វាន់ ASEAN Championship 2026៕

អត្ថបទ​៖ សេម កុសល