កីឡា

វីរៈកងទ័ព គង់ សំបូរ នឹងមានឱកាសឡើងកម្មវិធីធំ Kick Boxing ចុងឆ្នាំនេះដោយមានការជ្រោមជ្រែងពីលោក ហេង សុឃន

បានផុស

៦០ នាទី មុន

នៅ

ថ្ងៃសុក្រ ២៤ កក្កដា ២០២៦

ដោយ

បន្ទាប់ពីឃើញការបង្ហោះរបស់វីរៈកងទ័ព គង់ សំបូរ អំពីការដែលមិនសូវមានឱកាសឡើងប្រកួតតាមសង្វៀនកន្លងមកនេះលោក ហេង សុឃន ប្រធានសហព័ន្ធប្រដាល់ឃីកបុកស៊ីង (Kick Boxing) បានជួបជួយរូបគេ និងប្រកាសផ្ដល់ឱកាសឡើងកម្មវិធីធំនៅចុងឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សុឃន

នេះបើតាមការលើកឡើងលើហ្វេសបុកផេកលោក ហេង សុឃន ជាមួយកីឡាករ គង់ សំបូរ និង គង់ ហូវ បានបញ្ជាក់ថា ដោយមើលឃើញពីទុក្ខលំបាក និងភាពខ្វះខាតជីវភាពរស់នៅប្រចាំថ្ងៃស្របពេលមិនសូវបានឡើងប្រកួតនាពេលកន្លងមកចាប់ពីពេលនេះទៅលោកនឹងជួយសម្រួលដល់ការឡើងប្រកួត។

ក្នុងនាមប្រធានសហព័ន្ធឃីកប៊ុកស៊ីង និងដៃគូសហការជាមួយ Khmer Beverages នឹងផ្ដល់ឱកាសឲ្យអ្នកទាំងពីរបានឡើងប្រកួតទៅតាមពេលវេលាជាក់ស្ដែងនៃការស្នើសុំរបស់សាម៉ីកីឡាករផ្ទាល់។ លោកបន្ថែមទៀតថាប្រសិនបើចង់ប្រកួតពីរសប្ដាហ៍ម្ដងក៏បានផងដែរព្រោះខាងកម្មវិធីរបស់ Khmer Beverages គឺមានច្រើន។

កីឡាករ គង់ សំបូរ

យ៉ាងណាលោក ហេង សុឃន បញ្ជាក់ដែរថា កីឡាករខ្លួនឯងក៏ត្រូវហ្វឹកហាត់ពង្រឹងសមត្ថភាពឲ្យបានល្អផងដែរមិនថាការមកហ្វឹកហាត់ក្នុងក្លឹប ឬនៅឯបន្ទាយនោះទេ។ ក្រៅពីការឡើងប្រកួតប្រចាំខែហើយនោះសហព័ន្ធឃីកបុកស៊ីងនឹងផ្ដល់ឱកាសដល់អ្នកទាំងពីរបានឡើងប្រកួតក្នុងកម្មវិធីជ្រើសរើសជើងឯកអាស៊ី ដែលកម្ពុជាជាម្ចាស់ផ្ទះនៅខែធ្នូ ឆ្នាំ២០២៦ នេះទៀតផង។

គង់ សំបូរ និង គង់ ហូវ

បញ្ជាក់ដែរថា កាលពីថ្ងៃទី២១ ខែកក្កដា ឆ្នាំ២០២៦ នេះវីរៈកងទ័ព គង់ សំបូរ បានបង្ហោះសារនៅលើហ្វេសបុករបស់ខ្លួនអំពីការអន់ចិត្តដែលខាងប្រដាល់គុនខ្មែរមិនសូវឲ្យតម្លៃដូចជាការចាប់គូបានឡើងប្រកួតនោះឡើយ។ រូបគេថាប្រហែលឈប់ពីគុនខ្មែរហើយប្រសិនបើចាប់គូមិនបានទៀតនោះ។ គង់ សំបូរ និង គង់ ហូវ ជាកីឡាករប្រដាល់គុនខ្មែរផង និងជាវីរៈកងទ័ពផង និងបានឈរជើងការពារទឹកដីនៅសមរភូមិផ្ទាល់ផងដែរអំឡុងការឈ្លានពានពីសំណាក់សៀមកន្លងទៅនេះ៕