ម្ចាស់យានដ្ឋានជួសជុលរថយន្តលើផ្លូវ១៥៦ សហការជាមួយអាជ្ញាធរស្ទូចយករថយន្តចេញពីលើចិញ្ចើមផ្លូវ

គណៈបញ្ជាការឯកភាពខណ្ឌ៧មករា បានចុះរៀបចំសណ្ដាប់ធ្នាប់ និង ធ្វើការណែនាំដល់ម្ចាស់អាជីវកម្មជួសជុលរថយន្ត ដោយម្ចាស់អាជីវកម្មបានចូលរួមសហការជាមួយអាជ្ញាធរ ស្ទួចយករថយន្តចេញពីលើចិញ្ចើមផ្លូវ ដែលចតរំលោភផ្លូវសាធារណៈ។

ជាក់ស្ដែងនៅព្រឹកថ្ងៃទី០៨ ខែមករា ឆ្នាំ២០២៦ ដោយមានការណែនាំពីលោក ថេង សុថុល អភិបាលខណ្ឌ៧មករា បានចាត់អោយលោក ណុប ផា អភិបាលរងខណ្ឌ និងលោកវរសេនីយ៍ទោ ទឹម វុទ្ធី អធិការរងទទួលផ្នែកសណ្ដាប់ធ្នាប់ នៃអធិការដ្ឋាននគរបាលខណ្ឌ៧មករា ដឹកនាំកម្លាំងគណៈបញ្ជាការឯកភាពខណ្ឌ ចុះណែនាំដល់ម្ចាស់អាជីវកម្មជួសជុលរថយន្ត ហើយម្ចាស់យានដ្ឋានបានចូលរួមសហការ ជាមួយអាជ្ញាធរ ស្ទួចរថយន្តដែលចតលើចិញ្ជើមផ្លូវចេញ ស្ថិតនៅតាមបណ្ដោយផ្លូវលេខ១៥៦ ក្បែរបុរីកីឡា សង្កាត់វាលវង់ ខណ្ឌ៧មករា រាជធានីភ្នំពេញ។

លោក ណុប ផា អភិបាលរងខណ្ឌ៧មករា បានបញ្ជាក់ថាអាជ្ញាធរខណ្ឌតែងតែចុះរៀបចំ ជាប្រចាំតាមបណ្ដាផ្លូវផ្សេងៗ ក្នុងមូលដ្ឋានខណ្ឌ និង បានណែនាំដល់ម្ចាស់អាជីវកម្ម សូមចូលរួមជាមួយអាជ្ញាធរ ខណ្ឌ ដើម្បីរក្សានូវ បរិស្ថានអនាម័យ សណ្ដាប់ធ្នាប់សាធារណៈឲ្យបានល្អប្រសើរ។

លោកអភិបាលរងបានបន្ថែមថា ពេលចុះរៀបចំសណ្ដាប់ធ្នាប់ លោកបានណែនាំម្ចាស់ទីតាំងជួសជុលរថយន្ត ចូលរួមរក្សារសណ្ដាប់ធ្នាប់ កុំយកផ្លូវធ្វើជាចំណតបង្កការកក់ស្ទះ ត្រូវទុក ១ភាគ៣ នៃចិញ្ចើមផ្លូវសាធារណៈ ដើម្បីបង្កលក្ខណៈ ដល់ប្រជាពលរដ្ឋងាយស្រួលធ្វើដំណើរ។ លោកបញ្ជាក់ថា ក្នុងករណីមិនចូលរួម ឬ មិនសហការនោះអាជ្ញាធរនឹងចាត់វិធានការរដ្ឋបាល៕ អត្ថបទ ៖ រដ្ឋា