ព័ត៌មានជាតិ

យោធាថៃចាប់ខ្លួនយុវជនខ្មែរម្នាក់ ចូលទៅយកឯកសារនៅក្នុងផ្ទះរបស់ខ្លួន ដែលថៃឈ្លានពាននៅតំបន់បឹងត្រកួន

បានផុស

៦ ខែ មុន

នៅ

ថ្ងៃពុធ ១៤ មករា ២០២៦

ដោយ

ប៉ោយប៉ែត៖យោធាថៃបានឃាត់ខ្លួនយុវជនខ្មែរម្នាក់ ដែលចូលទៅក្នុងលំនៅដ្ឋានរបស់ខ្លួនក្នុងដែនដែលថៃបានឈ្លានពានដាក់កុងទីន័រ និងរាយបន្លាលួសហ៊ុំព័ទ្ធយកនៅតំបន់បឹងត្រកួនស្ថិតនៅក្នុងឃុំគោករមៀតស្រុកថ្មពួកខេត្តបន្ទាយមានជ័យ ក្រោយបទឈប់បាញ់នៃជម្លោះព្រំដែនកម្ពុជាថៃក្នុងអំឡុងខែធ្នូ ឆ្នាំ២០២៥។

យុវជនដែលយោធាថៃបានឃាត់ខ្លួនមានឈ្មោះ ផល ប៉ោង ហៅមាស ដាលីន ភេទប្រុស អាយុ២៩ឆ្នាំ រស់នៅភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យមានឪពុកឈ្មោះមាស ឡេង ត្រូវបានយោធាថៃចាប់បញ្ជូនទៅកាន់ខេត្តស្រះកែវប្រទេសថៃកាលពីម៉ោង ៨៖០០នាទីថ្ងៃ ទី១៣ ខែមករា ឆ្នាំ២០២៦ នៅចំណុចខាងត្បូងផ្សារបឹងត្រកួន ភូមិផ្លូវបំបែក ឃុំគោករមៀត។តាមបុរស ឈ្មោះ មាស ឡេង ត្រូវជាឪពុកបានឱ្យដឹងថា មុនពេលកើតហេតុរូបគាត់បានដឹកកូនតាមម៉ូតូទៅឈប់ត្រង់រង្វង់មូលផ្លូវចូលច្រកតំបន់បឹងត្រកួន ឱ្យកូនចុះដើរចូលទៅផ្ទះយកឯកសារដោយរូបគាត់មិនហានចូលដោយចាំយូរពេកទើបដឹងថា កូនត្រូវយោធាថៃចាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា មុនមានសង្រ្គាមរូបគាត់នឹងគ្រួសារប្រពន្ធកូនបានជម្លៀសទៅនៅខេត្តសៀមរាបជាមួយផ្ទះបងប្អូនមិនបានស្នាក់នៅតាមមណ្ឌលភៀសសឹកឡើយ។លុះថ្ងៃទី១៣ខែមករា ឆ្នាំ ២០២៦ក៏មកផ្ទះដែលត្រូវយោធាថៃដាក់កុងទីន័ររាយបន្លាលួសព័ទ្ធយកមិនអាចចូលបានក៏ឱ្យកូនចូល។ ដោយឡែកបើតាមលោក នៃ ពៅ មេឃុំគោករមៀតបានឱ្យដឹងថា ក្រោយទទួលបានព័តមានពីការឃាត់ខ្លួនពលរដ្ឋខ្មែរ ដោយយោធាថៃនៅចំណុចតំបន់បឹងត្រកួនដែលថៃហ៊ុំព័ទ្ធយកលោកបានស្រាវជ្រាវរកគ្រួសារមកសួរនាំបញ្ជក់ថា ពិតជាមានការចាប់មែនលើពលរដ្ឋរបស់គាត់មានផ្ទះនៅក្នុងភូមិបន្ទាយមានរិទ្ធ ហើយអាជ្ញាធរភូមិឃុំស្រុក កំពុងរៀបចំឯកសារដើម្បីឱ្យខាងទំនាក់ទំនងទាក់ទងទៅខាងថៃសុំឱ្យដោះលែងមកវិញ៕

ដោយ៖ អពៅ