ហ្សេលេនស្គី ប្រាប់​ថា ការ​បោះឆ្នោត​ធ្វើ​ឡើង​ទាល់តែ​សូរ​គ្រាប់​កាំភ្លើង​ស្ងាត់​សិន

ប្រធានាធិបតី វ៉ូឡូឌីមៀរ ហ្សេលេនស្គី បានច្រានចោលពាក្យចចាមអារ៉ាមអំពីសម្ពាធក្នុងការរៀបចំការបោះឆ្នោត ដោយលោកសង្កត់ធ្ងន់ថា ការបោះឆ្នោតនឹងមិនអាចកើតឡើងបានទេ លុះត្រាតែសូរ​គ្រាប់​កាំភ្លើងស្ងប់ស្ងាត់ ពោល​គឺ​មានបទឈប់បាញ់ និងការធានាសន្តិសុខច្បាស់លាស់។ នេះ​បើ​យោងតាម​ការ​​ផ្សាយ​របស់​សារព័ត៌មាន​បារាំង France24 កាល​​ពី​ថ្ងៃទី​១១​ខែ​កុម្ភៈ​ឆ្នាំ​២០២៦។

ទោះបីជាមានសេចក្តីរាយការណ៍ពីកាសែត Financial Times ដែល​ថាទីក្រុងវ៉ាស៊ីនតោនកំពុងជំរុញ​ឲ្យ​មានការបោះឆ្នោតក្នុងរយៈពេល​៣​ខែខាងមុខក៏ដោយ ក៏លោក​ហ្សេលេនស្គីបានបញ្ជាក់ច្បាស់ៗថា លំដាប់លំដោយគឺសាមញ្ញបំផុត៖ ត្រូវបញ្ចប់សង្គ្រាមជាមុនសិន ទើបការបោះឆ្នោតតាមក្រោយ។ លោកបានបង្ហើបថា បើរុស្ស៊ីយល់ព្រមតាមលក្ខខណ្ឌ ការបញ្ចប់អរិភាពអាចនឹងកើតមានឡើងនៅត្រឹមរដូវក្តៅឆ្នាំ​នេះ។

បញ្ហាប្រឈមផ្នែកភស្តុភារក្នុងការរៀបចំការបោះឆ្នោតក្នុងគ្រាមានសង្គ្រាម នៅតែជាឧបសគ្គដ៏ធំធេង។ ជាមួយនឹងប្រជាជនអ៊ុយក្រែនរាប់លាននាក់កំពុងភៀសខ្លួននៅបរទេស រាប់សែននាក់កំពុងប្រយុទ្ធនៅសមរភូមិមុខ និងអ្នកផ្សេងទៀតរស់នៅក្រោមការត្រួតត្រារបស់រុស្ស៊ី ការរៀបចំការបោះឆ្នោតដោយយុត្តិធម៌ និងសុវត្ថិភាព គឺជាកិច្ចការដ៏លំបាកបំផុត។ លើសពីនេះ ការស្ទង់មតិបង្ហាញថា សាធារណជនអ៊ុយក្រែនផ្ទាល់ ក៏មិនទាន់មានបំណង​ចង់ឃើញការបោះឆ្នោតក្នុងអំឡុងពេលសង្គ្រាមនេះដែរ។

ភាពស្របច្បាប់​ក្នុង​ការ​កាន់​តំណែង​របស់លោកហ្សេលេនស្គី​តែងតែត្រូវបានរុស្ស៊ីយកមកធ្វើជាប្រធានបទវាយប្រហារ ដោយសារអាណត្តិ៥​ឆ្នាំរបស់លោក (ដែល​ចាប់ផ្តើមក្នុងឆ្នាំ២០១៩) ត្រូវផុតកំណត់​តាំង​ពី​ឆ្នាំ២០២៤មក​ម៉្លេះ។ ទោះជាយ៉ាងណាក៏ដោយ មេ​ដឹកនាំ​អ៊ុយក្រែន​នៅតែរក្សាជំហររឹងមាំថា រាល់កិច្ចព្រមព្រៀងសន្តិភាពណាមួយដែលពាក់ព័ន្ធនឹងការបោះបង់ទឹកដី​ឲ្យ​មូស្គូ ត្រូវតែឆ្លងកាត់ការធ្វើប្រជាមតិពីប្រជាជន មិនមែនត្រឹមតែការបោះឆ្នោតរហ័សនោះទេ។ លោកបង្ហាញឆន្ទៈក្នុងការពន្លឿនការបោះឆ្នោតតាមផែនការសន្តិភាពរបស់អាមេរិក ប៉ុន្តែលក្ខខណ្ឌដែលមិនអាចខ្វះបានគឺ សន្តិភាព និងសន្តិសុខដែលមានស្ថិរភាពជា​មុន​៕

ប្រែសម្រួល៖ ឈាង