Update៖ លោក Yoon ត្រូវ​ជាប់​គុក​អស់មួយជីវិត ហើយ​​អតីត​រដ្ឋមន្ត្រី​ការពារ​ជាតិ​ជាប់​ទោស​៣០ឆ្នាំ

អតីតប្រធានាធិបតីកូរ៉េខាងត្បូង លោក Yoon Suk Yeol ត្រូវបានតុលាការសម្រេចផ្ដន្ទាទោសដាក់ពន្ធនាគារអស់មួយជីវិត បន្ទាប់ពីត្រូវបានរកឃើញថាមានទោសពីបទដឹកនាំការបះបោរ ក្នុងអំឡុងពេលប្រកាសច្បាប់អាជ្ញាសឹកកាលពីថ្ងៃទី​៣​ខែធ្នូ​ឆ្នាំ២០២៤។ នេះ​បើ​តាម​ការ​ផ្សាយ​របស់​ BBC នា​ថ្ងៃទី​១៩​ខែ​កុម្ភៈ​ឆ្នាំ​២០២៦។

សាលាដំបូងក្រុងសេអ៊ូលបានប្រកាសសាលក្រមជាប្រវត្តិសាស្ត្រ​​​នេះ ដោយសន្និដ្ឋានថា សកម្មភាពរបស់លោក Yoon រួមទាំងការបញ្ជូនកងទ័ពប្រដាប់អាវុធទៅកាន់វិមានសភា គឺជាការវាយប្រហារដោយផ្ទាល់ទៅលើគ្រឹះប្រជាធិបតេយ្យរបស់ជាតិ ដើម្បីរារាំងដំណើរការសភា និងចាប់ខ្លួនគូប្រជែងនយោបាយ។

ជាមួយ​គ្នា​នឹង​អតីតប្រធានាធិបតី មន្ត្រីជាន់ខ្ពស់ជាច្រើនរូបទៀតនៅក្នុងរដ្ឋបាលរបស់លោក ក៏ទទួលបានការផ្ដន្ទាទោសដាក់ពន្ធនាគារធ្ងន់ធ្ងរផងដែរ។ អតីតរដ្ឋមន្ត្រីការពារជាតិ លោក Kim Yong-hyun ត្រូវបានកាត់ទោសដាក់ពន្ធនាគារ​៣០ឆ្នាំ ចំណែកអតីតមេបញ្ជាការចារកម្ម លោក Roh Sang-won ទទួលទោស​១៨ឆ្នាំ។ ចំពោះមន្ត្រីប៉ូលិសវិញ មាន​អតីតអគ្គស្នងការនគរបាលជាតិ លោក Cho Ji-ho ត្រូវកាត់ទោស១២​ឆ្នាំ, អតីតស្នងការនគរបាលក្រុងសេអ៊ូល លោក Kim Bong-sik ទទួលទោស​១០​ឆ្នាំ និងលោក Mok Hyun-tae អតីតប្រធានសន្តិសុខសភា ជាប់​ទោស​៣​ឆ្នាំ។

សាលក្រមនេះបានបិទបញ្ចប់ទំព័រដ៏ច្របូកច្របល់បំផុតនៃវិបត្តិរដ្ឋធម្មនុញ្ញ ដែលកូរ៉េខាងត្បូងមិនធ្លាប់ជួបប្រទះក្នុងរយៈពេលជាច្រើនទសវត្សរ៍មកនេះ។ តុលាការបានបញ្ជាក់ថា ជនជាប់ចោទទាំងអស់មានរយៈពេលមួយសប្តាហ៍ដើម្បីធ្វើការប្តឹងឧទ្ធរណ៍ប្រឆាំងនឹងសាលក្រមនេះ៕

ប្រែសម្រួល៖ ឈាង