ឪពុកនិងកូនភ្លោះកំព្រា​ពីរនាក់ រួមទាំងពលរដ្ឋក្រីក្រចំនួន ៩ គ្រួសារ ទទួលអំណោយដោះស្រាយជីវភាព​​មួយ​រយៈ

លោក យិន វណ្ណៈ អភិបាលនៃគណៈអភិបាលស្រុកចិត្របុរី បានចាត់អភិបាលរងស្រុករួមជាមួយ លោកស្រី ឆូ គឹមស៊ត ប្រធានមន្ទីរកិច្ចការនារី នាំយកអំណោយមួយចំនួនចែកជូនគ្រួសារក្រីក្រមកពីភូមិទ្រាប ឃុំថ្មី និងភូមិស្រែដូង ឃុំថ្មអណ្តើក ស្រុកចិត្របុរី ខេត្តក្រចេះ កាលពីថ្ងៃទី៣ ខែមេសា ឆ្នាំ ២០២៦។

ក្នុងចំណោមពលរដ្ឋក្រីក្រទាំង ១០ គ្រួសារ ខាងលើ លោក ហឿន ហំ ត្រូវជាឪពុករបស់កុមារាចំនួនពីរនាក់ ជាកូនភ្លោះ ដែលរស់នៅក្នុងភូមិទ្រាប ឃុំថ្មី ស្រុកចិត្របុរី ខេត្តក្រចេះ។

បីនាក់ឪពុកកូន កំពុងរស់នៅក្នុងផ្ទះដែលសុំដីបងប្អូនធ្វើផ្ទះសម្រាប់ជាជម្រកសម្រាប់កូននិងប្រពន្ធ ប៉ុន្តែថ្មីៗនេះប្រពន្ធក៏​បាន​ចាកចេញទៅធ្វើការដោយពុំមានការទំនាក់ទំនងមកនោះទេ ហើយបានទុកកូនភ្លោះទាំងពីរនាក់រស់នៅជាមួយឪពុកផងដែរ។

ក្រុមការងារបានឲ្យដឹងថា ពលរដ្ឋក្រីក្រទាំង ១០ គ្រួសារមគឺមកពីឃុំចំនួន ២ គឺឃុំថ្មអណ្តើក និង ឃុំថ្មី ស្រុកចិត្របុរី ដោយក្នុង ១ ឃុំ មានចំនួន ៥ គ្រួសារ សរុបទាំងមាន ១០ គ្រួសារ។ ក្នុង ១ គ្រួសារ ទទួលបានអង្ករ ៣០ គីឡូ, មី​១ កេស, ទឹកត្រី១យួរ, ទឹកស៊ីអ៊ីវ១យួរ, ត្រីខ១យួរ, ប្រេងសណ្តែក១ដបកន្លះលីត្រ ដើម្បីដោះស្រាយការហូបចុកប្រចាំថ្ងៃបានមួយរយៈ៕

អត្ថបទ៖ ប្រុញ វិធិន