ជនពិការម្នាក់ស្នើប្រជាជនខ្មែរគាំទ្រ សាប៊ូលាង​​ចានរបស់ខ្លួន ខណៈការលក់មិនសូវចំណេញ

ស្ថិតនៅក្នុងវ័យ ៤៦ឆ្នាំ លោក នួន សុខឃឿន ជាជនពិការម្នាក់មានជំនាញផលិតសាប៊ូលាងចានស្នើសុំចិត្តប្រជាជនខ្មែរគាំទ្រផលិតផលសាប៊ូលាងចានរបស់ខ្លួន ខណៈការលក់ដូរមិនសូវកាក់កបដោយសារតែត្រូវប្រើប្រាស់វត្ថុធាតុដើមមានតម្លៃខ្ពស់។

ថ្លែងប្រាប់ កម្ពុជាថ្មី លោក សុខឃឿន បានឱ្យដឹងថា រយៈពេលចុងក្រោយនេះ ការផលិតសាប៊ូរបស់លោកហាក់ពិបាករកទីផ្សារបន្ដិច ចំណែកឯការចំណេញក៏ពុំសូវបានច្រើន ដ្បិតអីការផលិតសាប៊ូត្រូវចំណាយដើមខ្ពស់ដោយសារទិញវត្ថុធាតុដើមពីប្រទេសចិន និងវៀតណាម។

លោក នួន សុខឃឿន អះអាងថា សព្វថ្ងៃនេះ នៅពេលលោកផលិតសាប៊ូបាន លោកត្រូវចំណាយពេលជិះដើរលក់តាមដងផ្លូវនានាក្នុងរាជធានីភ្នំពេញ និងពេលខ្លះក៏មានម៉ូយប្រចាំដែលមានតម្រូវការសាប៊ូលាងចានតាមតូបចាប់ហួយមួយចំនួនផងដែរ។ សម្រាប់តម្លៃវិញ លោក នួន សុខឃឿន បានបញ្ជាក់ថា សាប៊ូលាងចានដែលលោកបានផលិតលក់ដោយខ្លួនឯងនេះ អាចលក់ចេញបានក្នុងចំណុះ ៣០លីត្រ តម្លៃ ៣ម៉ឺនរៀល មិនថាលក់នៅផ្ទះ ឬក៏តាមផ្លូវសាធារណៈ ​​នោះឡើយ។

ចំពោះការផលិតសាប៊ូលាងចានរបស់លោកសុខឃឿន ពុំទាន់មានស្ដង់ដាត្រឹមត្រូវដូចទៅនឹងក្រុមហ៊ុន រោងចក្រ ឬសហគ្រាសក៏ពិតមែន ប៉ុន្ដែគុណភាព និងតម្លៃវិញ លោកថា អតិថិជនគឺអាចទទួលយកបានដ្បិតតម្លៃក៏សមរម្យផងដែរ។

យ៉ាងណាមិញ លោក សុខឃឿន ក៏សុំស្នើចិត្តប្រជាជនខ្មែរជួយគាំទ្រផលិតផលដែលជាស្នាដៃរបស់ឱ្យបានច្រើនជាងមុន ដើម្បីធ្វើយ៉ាងណាអាចឱ្យគាត់អាចមានលទ្ធភាពបន្ដអាជីវកម្មលក្ខណៈគ្រួសារមួយនេះតទៅមុខផងដែរ៕

អត្ថបទ ៖ សួស សិត