ខេត្តតាកែវបូកសរុបលទ្ធផលថ្នាលអប់រំឌីជីថល «EBC» ខណៈគ្រូជាង៩០០នាក់ និងសិស្សជាង២មុឺននាក់ ទទួលបានអត្ថប្រយោជន៍

រដ្ឋបាលខេត្តតាកែវ នៅព្រឹកថ្ងៃទី១៩ ខែមិថុនា ឆ្នាំ២០២៦ បានរៀបចំកិច្ចប្រជុំបូកសរុបលទ្ធផលនៃការអនុវត្តថ្នាលអប់រំឌីជីថល EBC (E-Learning and Blended Learning Platform) សម្រាប់ឆ្នាំសិក្សា ២០២៥-២០២៦ នៅតាមវិទ្យាល័យចំនួន១៨ ដែលមានមជ្ឈមណ្ឌលបច្ចេកវិទ្យាសហគមន៍ (CTC) ព្រមទាំងលើកទិសដៅការងារបន្ត ដើម្បីពង្រឹងការអប់រំបែបឌីជីថលនៅមូលដ្ឋាន។

កិច្ចប្រជុំនេះ ប្រព្រឹត្តទៅក្រោមអធិបតីភាព លោក សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ លោក សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា និងលោក យង់ សុវឌ្ឍនា អភិបាលរងខេត្តតាកែវ ដោយមានការចូលរួមពីថ្នាក់ដឹកនាំ មន្ត្រីជំនាញ អាជ្ញាធរមូលដ្ឋាន និងគណៈគ្រប់គ្រងសាលារៀនសរុបចំនួន ១៨៥នាក់។

យោងតាមរបាយការណ៍បូកសរុប ក្នុងឆ្នាំសិក្សា ២០២៥-២០២៦ ថ្នាល EBC ត្រូវបានអនុវត្តដោយជោគជ័យនៅវិទ្យាល័យទាំង១៨ ដែលមាន CTC ដោយបានបណ្តុះបណ្តាល និងចុះឈ្មោះគ្រូបង្រៀនចំនួន ៩១១នាក់ និងសិស្សានុសិស្សសរុប ២៣,៩៦៦នាក់ ឱ្យប្រើប្រាស់ប្រព័ន្ធអប់រំឌីជីថលនេះ។

លទ្ធផលនៃការអនុវត្តបានបង្ហាញថា ថ្នាល EBC បានរួមចំណែកយ៉ាងសំខាន់ក្នុងការលើកកម្ពស់គុណភាពសិក្សា កាត់បន្ថយអត្រាសិស្សត្រួតថ្នាក់ ពង្រឹងជំនាញឌីជីថល និងជំរុញឱ្យសិស្សមានភាពម្ចាស់ការក្នុងការសិក្សា និងស្រាវជ្រាវកាន់តែប្រសើរ។ ជាមួយគ្នានេះ គ្រូបង្រៀនក៏បានផ្លាស់ប្តូរវិធីសាស្ត្របង្រៀនពីបែបប្រពៃណី ទៅកាន់ការបង្រៀនបែបឌីជីថល និងជំរុញការរៀនសូត្រយ៉ាងសកម្ម។

គួររំលឹកថា ថ្នាល EBC ត្រូវបានបង្កើតឡើងក្នុងអំឡុងវិបត្តិកូវីដ-១៩ ក្រោមកិច្ចសហការរវាងក្រសួងប្រៃសណីយ៍ និងទូរគមនាគមន៍ និងដៃគូអភិវឌ្ឍន៍ពីសាធារណរដ្ឋកូរ៉េ។ បច្ចុប្បន្ន ថ្នាលនេះបានក្លាយជាវេទិកាអប់រំឌីជីថលដ៏សំខាន់មួយ សម្រាប់គាំទ្រដល់ការបង្រៀន និងការរៀននៅកម្ពុជា ស្របតាមគោលនយោបាយបរិវត្តកម្មឌីជីថល និងការអភិវឌ្ឍធនធានមនុស្សរបស់រាជរដ្ឋាភិបាល។

មន្ត្រីជំនាញបានវាយតម្លៃថា សមិទ្ធផលដែលសម្រេចបាននាពេលនេះ នឹងក្លាយជាមូលដ្ឋានដ៏សំខាន់សម្រាប់ការពង្រីកការអប់រំឌីជីថល និងការកាត់បន្ថយគម្លាតបច្ចេកវិទ្យារវាងទីក្រុង និងជនបទ ព្រមទាំងជំរុញឱ្យប្រព័ន្ធអប់រំនៅខេត្តតាកែវ និងទូទាំងប្រទេស៕ ដោយ ៖ វីរៈ