ទូតកម្ពុជាប្រចាំសាធារណរដ្ឋកូរ៉េ ជំរុញក្រុមហ៊ុន Asiana Airlines បើកជើងហោះហើរត្រង់មកកាន់ខេត្តសៀមរាប

លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី បានជួបពិភាក្សាការងារជាមួយ លោក Song Bo Young នាយកប្រតិបត្តិនៃក្រុមហ៊ុន Asiana Airlines ដើម្បីពង្រឹងកិច្ចសហប្រតិបត្តិការ និងជំរុញឱ្យមានជើងហោះហើរត្រង់ពីទីក្រុងសេអ៊ូល មកកាន់ខេត្តសៀមរាប។ ជំនួបនេះធ្វើឡើងនៅទីស្នាក់ការកណ្តាលក្រុមហ៊ុន Asiana ក្នុងទីក្រុងសេអ៊ូល កាលពីថ្ងៃទី០២ ខែកក្កដា​ ឆ្នាំ២០២៦។

ក្នុងឱកាសនៃជំនួប  ភាគីទាំងពីរបានផ្លាស់ប្តូរយោបល់លើស្ថានភាពទូទៅនៃការធ្វើដំណើរទៅមកតាមអាកាសចរណ៍ Asiana Airlines របស់ប្រជាជនកម្ពុជា និងកូរ៉េ ព្រមទាំងបានពិភាក្សាអំពីការបន្តពង្រឹងកិច្ចសហប្រតិបត្តិការរវាងស្ថាប័នទាំងពីរ ក្នុងគោលបំណងសម្រួលដល់ការធ្វើដំណើររបស់ប្រជាជនខ្មែរ ដែលតែងតែទុកចិត្ត និងប្រើប្រាស់សេវាកម្មរបស់ក្រុមហ៊ុន Asiana Airlines និងដើម្បីបង្កើនចំនួនអ្នកទេសចរកូរ៉េទៅទស្សនាប្រទេសកម្ពុជា។

លោកឯកអគ្គរាជទូត បានលើកឡើងថា មានភ្ញៀវទេសចរកូរ៉េ និងបរទេសជាច្រើនមានបំណងទៅទស្សនាប្រាសាទអង្គរវត្តរបស់កម្ពុជា ដូច្នេះសង្ឃឹមថា ក្រុមហ៊ុននឹងពិចារណាពិនិត្យលទ្ធភាពបើកជើងហោះហើរត្រង់ពីទីក្រុងសេអ៊ូល ទៅកាន់ខេត្តសៀមរាប ដើម្បីសម្រួលដល់អ្នកទេសចរ ដែលមានបំណងធ្វើដំណើរកំសាន្តដោយផ្ទាល់ទៅកាន់ខេត្តទេសចរណ៍វប្បធម៌មួយនេះ។

ជាការឆ្លើយតប លោក Song បានជម្រាបជូន លោកឯកអគ្គរាជទូត ថាក្រុមហ៊ុននឹងពិចារណាពិនិត្យលទ្ធភាពក្នុងការរៀបចំជើងហោះហើរត្រង់ទៅខេត្តសៀមរាប នាពេលអនាគត៕