ព័ត៌មានជាតិ

អាជ្ញាធរខេត្តកំពង់ឆ្នាំងត្រៀមចុះរុះរើតូបលក់ដូរមុខផ្សារឆ្នាំង ដើម្បីចាក់ដីធ្វើទួលសុវត្ថិភាពមុនពេលរដូវទឹកឡើង

បានផុស

៥ years មុន

នៅ

ថ្ងៃចន្ទ ១៧ ឧសភា ២០២១

ដោយ

អាជ្ញាធរក្រុងកំពង់ឆ្នាំង និងសមត្ថកិច្ច នៅថ្ងៃទី១៧ ខែឧសភានេះ បានចុះផ្សព្វផ្សាយ មុនពេលការចុះរុះរើសំណង់មិនរៀបរយនៅជួរដើមស្រល់មុខផ្សារឆ្នាំងស្ថិតនៅក្នុងសង្កាត់ផ្សារឆ្នាំង ក្រុងកំពង់ឆ្នាំង ដើម្បីជំរុញការចាក់ដីធ្វើទីទួលសុវត្ថិភាពឱ្យបានរួចរាល់មុនពេលទឹកទន្លេឡើង។

អាជ្ញាធរក្រុងបញ្ជាក់ថាការចុះផ្សព្វផ្សាយនេះ គឺឱ្យប្រជាពលរដ្ឋអាជីវករព្រមរុះរើ ប៉ុន្តែប្រសិនបើករណីអាជីវករមិនព្រមរុះរើតាមការជូនដំណឹងនោះសមត្ថកិច្ចនឹងចុះអនុវត្តវិធានការរដ្ឋបាលដែលគណៈបញ្ជាការឯកភាពរដ្ឋបាលខេត្តបានជូនដំណឹងរួចហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីការជូនដំណឹងប៉ុន្មានថ្ងៃគេពិនិត្យឃើញថាមានអាជីវករមួយចំនួនតូចប្រមាណ ៤នាក់ បានស្ម័គ្រចិត្តរុះរើតូបលក់ដូរដោយខ្លួនឯង ខណៈដែលអាជីវករភាគច្រើនមិនព្រមរុះរើតូបតាមការជូនដំណឹងរបស់អាជ្ញាធរឡើយ ដែលនឹងអាចត្រូវប្រឈមក្នុងការអនុវត្តវិធានការរដ្ឋបាលរបស់សមត្ថកិច្ចឆាប់ៗនេះ។

កន្លងទៅថ្មីៗនេះ អភិបាលរងក្រុងកំពង់ឆ្នាំង លោក បេ សារុំ បានប្រាប់ឱ្យដឹងថាតូបអាជីវករលក់ដូរនៅជួរដើមស្រល់ និងនៅមុខខណ្ឌរដ្ឋបាលជលផលកំពង់ឆ្នាំង សរុបមានចំនួន១៩៦តូប ដែលកន្លងមកពួកគាត់ធ្លាប់ធ្វើកិច្ចសន្យាជាមួយអាជ្ញាធរក្រុងក្នុងឆ្នាំ២០១៩ថា នឹងបន្លាស់ទីតូបលក់ដូរទៅលក់ដូរនៅក្នុងផ្សារកំពង់ឆ្នាំងថ្មីវិញ នៅពេលអាជ្ញាធរខេត្តធ្វើផ្លូវលំក្នុងភូមិចុងកោះឲ្យផុតពីទឹកទន្លេឡើងរួច ដើម្បីងាយស្រួលដល់ការរុះរើតូបបន្លាស់ទីរបស់ពួកគាត់។

លោកអភិបាលរងក្រុងបន្តថា ជាក់ស្ដែងមកដល់ចុងឆ្នាំ២០២០ នេះអាជ្ញាធរក៏បានធ្វើផ្លូវលំនៅក្នុងភូមិចុងកោះឲ្យខ្ពស់ផុតពីទឹកទន្លេឡើងរួចរាល់ហើយ ប៉ុន្តែពួក គាត់នៅតែមិនព្រមស្ម័គ្រចិត្តរុះ រើតូបដោយខ្លួនឯងឡើយ។ ហេតុ នេះហើយទើបអាជ្ញាធរខេត្តក្រុងចេញសេចក្ដីប្រកាសព័ត៌មានថា នឹងចាត់វិធានការរដ្ឋ បាលចំពោះអាជីវករណាដែលមិន ព្រមរុះរើតូបដោយស្ម័គ្រចិត្ត៕