បិទតូបលក់ដូរនៅផ្សារស្វាយជ្រំ ខេត្តស្វាយរៀង ចាប់ពីថ្ងៃនេះដល់ថ្ងៃទី៥ កក្កដា

ស្វាយរៀង៖ រដ្ឋបាលស្រុកស្វាយជ្រំ បានចេញសេចក្ដីជូនដំណឹងជូនដល់សាធារណជនប្រជាពលរដ្ឋ ជាពិសេសអាជីវករផ្សារស្វាយជ្រំ ស្ដីពីការបិទ បិទដំណើរការតូបលក់ដូរនៅផ្សារស្វាយជ្រំបណ្ដោះអាសន្ន បន្ទាប់ពីបានរកឃើញករណីវិជ្ជមានកូវីដ-១៩ ស្ថិតនៅភូមិតាប៉ ឃុំតាសួស ស្រុកស្វាយជ្រំ ខេត្តស្វាយរៀងចំនួន០៧នាក់។ ដោយក្រុមការងារស្រុក បានសហការជាមួយអាជ្ញាធរឃុំ ចុះស្រាវជ្រាវរកអ្នកប៉ះពាល់ផ្ទាល់ និងប្រយោលជាមួយអ្នកជំងឺខាងលើរកឃើញប្រមាណជាង៤០នាក់ហើយនៅរសៀលថ្ងៃទី២១ ខែមិថុនា ឆ្នាំ២០២១ ក្រុមការងារបាន និងកំពុងបន្តចុះស្រាវជ្រាវរកអ្នកពាក់ព័ន្ធផ្ទាល់ និងប្រយោលបន្តទៀតដើម្បីទប់ស្កាត់ការឆ្លងរាលដាលជំងឺកូវីដ-១៩ នៅទីផ្សារក៏ដូចជាទីប្រជុំជនស្រុកស្វាយជ្រំ។

រដ្ឋបាលស្រុកស្វាយជ្រំ សូមធ្វើការបិទដំណើរការលក់ដូរតូបជាបណ្ដោះអាសន្ន នៅទីប្រជុំជនផ្សារស្វាយជ្រំរយៈពេល១៤ថ្ងៃ ចាប់ពីម៉ោង 00:00 ថ្ងៃទី២២ ខែមិថុនា នៅដល់ថ្ងៃទី០៥ ខែកក្កដា ឆ្នាំ២០២១ ដើម្បីចូលរួមបង្ការទប់ស្កាត់ និងកាត់ផ្ដាច់ឫសគល់នៃការរីករាលដាលឆ្លងជំងឺកូវី-១៩បន្តទៀត។

ទន្ទឹមនឹងនេះរដ្ឋបាលស្រុកស្វាយជ្រំ បានអំពាវនាវដល់ប្រជាពលរដ្ឋអាជីវករទាំងអស់ដែលធ្លាប់មានការប៉ះពាល់ជាមួយអ្នកជំងឺកូវីដ-១៩ខាលើ បើមានអាការក្ដៅខ្លួន ក្អក ពិបាកដកដង្ហើម និងមានការសង្ស័យថាការឆ្លងមេរោគកូវីត-១៩ សូមអញ្ជើញយកសំណាកធ្វើតេស្តមេរោគ ជាបន្ទាន់នូវទីតាំងសាលាបឋមសិក្សាក្រោលគោ ឃុំក្រោលគោ និងទំនាក់ទំនងលេខទូរសព្ទ 097 7816 403 ឬ ទំនាក់ទំនងមកក្រុមការងារស្រាវជ្រាវ និង តាមដានបុគ្គលសង្ស័យថាមានផ្ទុកជំងឺកូវីដ-១៩ ខេត្ត 088 783 6666 ឬ 097 503 4567 ដើម្បីមានវិធានការបន្ត។

សម្រាប់អ្នកដែលគ្មានរោគសញ្ញាសូមដាក់ខ្លួនដាច់ដោយឡែក និងតាមដានសុខភាពរបស់ខ្លួន រយៈពេល១៤ថ្ងៃ ចាប់ពីថ្ងៃដែលបានប៉ះពាល់ ឬទៅទីកន្លែងនោះ៕

អត្ថបទ៖ ភក្ដី