លទ្ធផលបោះឆ្នោតបឋម៖ គណបក្សប្រជាជនកម្ពុជា ទទួលបានសំឡេងគាំទ្រ ចំនួន១៧ សំឡេង លើ១៧សំឡេង

គណៈកម្មាធិការជាតិរៀបចំការបោះឆ្នោត (គ.ជ.ប) នៅរសៀលថ្ងៃទី២៥ ខែកក្កដា ឆ្នាំ២០២១នេះ បានប្រកាសលទ្ធផលបឋម នៃការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត។

តាមមន្ត្រី គ.ជ.ប សមាជិកក្រុមប្រឹក្សាក្រុងបូកគោ ​នៃខេត្តកំពត សម្រាប់អាណត្តិទី១ មានចំនួន១៣រូប ហើយអង្គ​បោះឆ្នោត គឺជាក្រុមប្រឹក្សាសង្កាត់ក្នុងមុខតំណែង ដែលមានចំនួន១៧រូប មកពីសង្កាត់ចំនួន៣ រួមមាន៖ សង្កាត់​កោះតូច, សង្កាតបឹងទូក, និងសង្កាត់ព្រែកត្នោត។

សម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោនេះ មានគណបក្សនយោបាយចំនួន​៤ ចូលរួមប្រកួតប្រជែង រួមមាន៖ គណបក្សហ៊្វុនស៊ិនប៉ិច, គណបក្សយុវជនកម្ពុជា, គណបក្សប្រជាជនកម្ពុជា​, និងគណបក្សសញ្ជាតិកម្ពុជា។

ជាលទ្ធផលបឋម បានបង្ហាញថា គណបក្សហ៊្វុនស៊ិនប៉ិច មិនទទួលបានសំឡេងគាំទ្រទេ, គណបក្សយុវជនកម្ពុជា ក៏ពុំទទួលបានសំឡេងគាំទ្រដែរ, គណបក្សប្រជាជនកម្ពុជា ទទួលបានសំឡេងគាំទ្រចំនួន១៧​សំឡេង, និងគណ​បក្សសញ្ជាតិកម្ពុជា ពុំទទួលបានសំឡេងគាំទ្រទេ។

សូមជម្រាបថា បើតាម គ.ជ.ប ដំណើរការ នៃការបោះឆ្នោតលើកទី១ ដើម្បី​ជ្រើសរើសក្រុមប្រឹក្សាក្រុងបូកគោ នៃខេត្តកំពត បានប្រព្រឹត្តទៅដោយរលូន ស្របតាមច្បាប់ បទបញ្ជា និងនីតិវិធី ប្រតិទិនការងារ និងលិខិតបទដ្ឋាន គតិយុត្តពាក់ព័ន្ធ៕ (ដោយ)៖ ឃួន សុភ័ក្រ