ព័ត៌មានជាតិ

រណ្តៅដីយក្សមួយកន្លែង ត្រូវពលរដ្ឋរិះគន់ថារថយន្តដឹកដីបើកលឿនបង្កការព្រួយបារម្ភពីសុវត្ថិភាពក្មេងៗ

បានផុស

៤ years មុន

នៅ

ថ្ងៃសុក្រ ២៧ វិច្ឆិកា ២០២០

ដោយ

តាកែវ ៖ រណ្តៅដីយក្សមួយកន្លែងស្ថិតនៅភូមិសែនបន ឃុំលាយបូរ ស្រុកត្រាំកក់ ខេត្តតាកែវ កំពុងបង្កផលប៉ះពាល់ដល់ប្រជាពលរដ្ឋយ៉ាងខ្លាំង ខណៈដែលរថយន្តដឹកដីចេញពីទីតាំងនេះបើកបរក្នុងភូមិមានល្បឿនលឿននិងមិនបានគ្របបិតបាំងត្រឹមត្រូវតាមលក្ខណៈបច្ចេកទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រណ្តៅដី ដែលមានជម្រៅជ្រៅលើសពី៣ម៉ែត្រ និងទំហំធំជាងកន្លះហិចតា របស់លោកថៅកែម្នាក់ កំពុងជីកកាយយកអាចម៍ដី ដឹកលក់យ៉ាងកក្រើក ត្រូវបានពលរដ្ឋអ្នករស់នៅក្បែរទីតាំងនោះត្អូញត្អែររអ៊ូរទាំថា មួយថ្ងៃៗមានរថយន្តដឹកដីចេញពីរណ្តៅនេះរាប់រយជើង សម្លេងឡានឮសូរមិនឈប់ដីហុយទ្រលោម ពិសេសជាងនេះពួកគាត់ព្រួយបារម្ភពីសុវត្ថិភាពក្មេងៗក្នុងភូមិនិងក្មេងៗដែលទៅសាលារៀន។

ជុំវិញរណ្តៅដីនេះ លោក ផេង វុធ ប្រធានមន្ទីររ៉ែនិងថាមពលខេត្តតាកែវបានឲ្យដឹងនៅព្រឹកថ្ងៃទី២៧ ខែវិច្ឆិកា ឆ្នាំ២០២០ តាមរយៈខ្សែទូរសព្ទយ៉ាងខ្លីថា គេមានច្បាប់ហើយ បើគ្មានច្បាប់គ្មាននរណាគេកាយទេ។

សូមបញ្ជាក់ថា តាមការអនុវត្តមុខងារដែលក្រសួងរ៉ែនិងថាមពលបានផ្ទេរឲ្យរដ្ឋបាលក្រុង ស្រុក ខណ្ឌ សម្រាប់មន្ទីររ៉ែនិងថាមពលរាជធានី ខេត្ត ដែលក្នុងនោះ ការផ្តល់និងការចុះបញ្ជីអាជ្ញាប័ណ្ណសិប្បកម្មធនធានរ៉ែសម្រាប់សេវាកម្មជីកអាចម៍ដី រណ្តៅដីចល័តដែលមានផ្ទៃក្រឡាមិនលើសពីកន្លះហិចតា និងជម្រៅមិនលើសពី០៣ម៉ែត្រ ឬប្រតិបត្តិការបកយកអាចម៍ដីដែលមានផ្ទៃក្រឡាមិនលើសពីមួយហិចតា និងជម្រៅមិនលើសពី០១ម៉ែត្រ។

ក្នុងន័យខាងលើនេះ បើលោក ផេង វុធ ប្រធានមន្ទីររ៉ែនិងថាមពលខេត្តតាកែវថា រណ្តៅដីថៅកែ ថូ មានច្បាប់ត្រឹមត្រូវនោះ តើលោកប្រធានមានដែលចុះទៅពិនិត្យមើលពីជម្រៅនិងទំហំដែរឬទេ? ឬមួយ លោកប្រធាន រ៉ែខេត្តនិងថៅកែ ថូ ស៊ីចង្វាក់គ្នាហើយ៕
ដោយ ៖ វីរៈ