ទោះជាសះស្បើយពីកូវីដ មនុស្សមួយចំនួន នៅតែមានអាការ ៥យ៉ាងនេះ រយៈពេល៦ខែ

ការស្ទាបស្ទង់មួយដោយក្រុមស្រាវជ្រាវនៅប្រទេសជប៉ុន បានបង្ហាញថា អ្នកជំងឺម្នាក់ក្នុងចំណោមអ្នកជំងឺកូវីដ ៤នាក់ នៅតែមានរោគសញ្ញាក្រោយជាសះស្បើយបានកន្លះឆ្នាំ ហើយស្ត្រីមានហានិភ័យខ្ពស់ជាងបុរស។

ការស្ទាបស្ទង់ដោយ មជ្ឈមណ្ឌលជាតិសម្រាប់សុខភាពនិងវេជ្ជសាស្ត្រសកល និងស្ថាប័នដទៃទៀតបាន ស្ទង់មតិលើមនុស្សចំនួន ៤៥៧ នាក់ដែលបានជាសះស្បើយពីជំងឺកូវីដ-១៩ ចាប់តាំងពីខែកុម្ភៈឆ្នាំ ២០២០មក។ ពួកគេមានអាយុចន្លោះពី ២០ ទៅ ៧០ ឆ្នាំ។

ក្រុមនេះនិយាយថា ២៦,៣ ភាគរយនៃពួកគេ គឺមានរោគសញ្ញាដូចជាអស់កម្លាំង បន្ទាប់ពីរយៈពេល ៦ ខែបានកន្លងផុតទៅ។

ស្របពេលជាមួយគ្នានោះ ប្រហែល ៧,៧ ភាគរយនៃអ្នកជាសះស្បើយ បានរាយការណ៍ថាមានបញ្ហាជាមួយនឹងក្លិន, ៦,៦ភាគរយមានអារម្មណ៍អស់កម្លាំង, ៣,៩ ភាគរយដកដង្ហើមខ្លី, ៣,៥ភាគរយមានបញ្ហាទាក់ទងនឹងរសជាតិនិង ៣,១ភាគរយជ្រុះសក់។

លើសពីនេះ មួយឆ្នាំបន្ទាប់ពីជាសះស្បើយ ៨,៨ភាគរយនៅតែមានរោគសញ្ញាខ្លះ ដោយក្នុងនោះ ៣,១ភាគរយបានត្អូញត្អែរពីភាពអស់កម្លាំង, ១,៥ភាគរយដកដង្ហើមខ្លី, ១,១ភាគរយបាត់បង់ក្លិននិងរសជាតិ ហើយ០,៤ភាគរយជ្រុះសក់។

ការស្ទាបស្ទង់ក៏បានបង្ហាញផងដែរថា បើប្រៀបធៀបទៅ ស្ត្រីគឺមានហានិភ័យបញ្ហាក្លិនខ្លាំងជាងបុរស ១.៩ដងរីឯការបាត់បង់ក្លិនខ្ពស់ជាង១.៦ដង អស់កម្លាំងខ្លាំងជាង២ដង និងជ្រុះសក់ច្រើនជាង៣ដង៕

ប្រែសម្រួល៖ Vann Vann

ប្រភព៖ NHK

ចុចអាន៖ អាការ ៥យ៉ាងកើតឡើងទូទៅបំផុត ចំពោះអ្នកចាក់ Sinovac ២ដូស រួចចាក់ AstraZeneca ជាដូសជំរុញ