ព័ត៌មានអន្ដរជាតិ

មកស្គាល់ឧបនាយករដ្ឋមន្ត្រីថៃ ដន ប្រាម៉ាត់វីណៃ ដែលកំពុងធ្វើ ទស្សនកិច្ចនៅ កម្ពុជា នាពេលនេះ

បានផុស

៥ years មុន

នៅ

ថ្ងៃសុក្រ ១៧ ធ្នូ ២០២១

ដោយ

លោក ដន ប្រាម៉ាត់វីណៃ (Don Pramudwinai) ឧបនាយករដ្ឋមន្ត្រីនៃព្រះរាជាណាចក្រថៃ បានអញ្ជើញមកបំពេញទស្សនកិច្ចផ្លូវការនៅ ព្រះរាជាណាចក្រកម្ពុជា និងធ្វើជាសហប្រធានជាមួយលោកឧបនាយករដ្ឋមន្ត្រី ប្រាក់ សុខុន ដឹកនាំកិច្ចប្រជុំលើកទី១១ នៃគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី (JC) រវាងកម្ពុជា និងថៃ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅ ព្រឹកថ្ងៃសុក្រនេះដែរលោក ដន ប្រាម៉ាត់វីណៃ នឹងចូលជួបសម្ដែងការគួរសម និងពិភាក្សាការងារជាមួយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅ វិមានសន្តិភាពទីស្តីការនាយករដ្ឋមន្ត្រី ។

លោកឧបនាយករដ្ឋមន្ត្រី ដន ប្រាម៉ាត់វីណៃ ដែលកំពុងបំពេញទស្សនកិច្ចផ្លូវការនៅ កម្ពុជារយៈពេល ៣ ថ្ងៃគឺចាប់ពីថ្ងៃទី ១៦ ដល់ ១៧ ខែធ្នូ ឆ្នាំ២០២១ នេះគឺជាអ្នកការទូតថៃបម្រើការជារដ្ឋមន្ត្រីការបរទេសរបស់រដ្ឋាភិបាលលោក ប្រាយុទ្ធ ចាន់អូចា ចាប់តាំងពីឆ្នាំ ២០២០ មកម្ល៉េះ ។

នៅ ឆ្នាំ ១៩៩២ អ្នកការទូតវ័យ ៧១ រូបនេះត្រូវបានតែងតាំងជាអគ្គនាយកនៃនាយកដ្ឋានកិច្ចការអាស៊ីបូព៌ា ។ ពីឆ្នាំ ១៩៩៤ ដល់ ១៩៩៨ លោក ដន ប្រាម៉ាត់វីណៃ ត្រូវបានតែងតាំងជាឯកអគ្គរាជទូតថៃប្រចាំប្រទេសស្វីស បុរីវ៉ាទីកង់ និងប្រទេសលិចតិនស្តាញ (Liechtenstein) ។

ក្រោយមកនៅ ឆ្នាំ ១៩៩៩ ដល់ឆ្នាំ ២០០០ លោកគឺជាអ្នកនាំពាក្យក្រសួងការបរទេសថៃ ហើយពីឆ្នាំ ២០០០ ដល់ឆ្នាំ ២០០៤ លោកបានបម្រើការជាឯកអគ្គរដ្ឋទូតប្រចាំប្រទេសចិន កូរ៉េខាងជើង និងម៉ុងហ្គោលី ។

ចំណែកពីឆ្នាំ ២០០៤ ដល់ ២០០៧ លោកបានបម្រើការជាឯកអគ្គរាជទូតប្រចាំសហភាពអឺរ៉ុប ហើយចាប់ពីឆ្នាំ ២០០៧ ដល់ឆ្នាំ ២០០៩ លោកបានបម្រើការជាតំណាងអចិន្ត្រៃយ៍របស់អង្គការសហប្រជាជាតិ (UN) នៅ ទីក្រុងញូវយ៉ក ខណៈពីឆ្នាំ ២០០៩ ដល់ឆ្នាំ ២០១០ លោកបានបម្រើការជាឯកអគ្គរាជទូតប្រចាំសហរដ្ឋអាមេរិក ។

រីឯក្នុងឆ្នាំ ២០១៥ លោក ដន ប្រាម៉ាត់វីណៃ ត្រូវបានដំឡើងឋានៈជារដ្ឋមន្ត្រីក្រសួងការបរទេសថៃ ។ ក្នុងការរុះរើគណៈរដ្ឋមន្ត្រីកាលពីខែសីហា ឆ្នាំ២០២០ លោកក៏ត្រូវបានតែងតាំងជាឧបនាយករដ្ឋមន្ត្រីបន្ថែមលើតួនាទីជារដ្ឋមន្ត្រីក្រសួងការបរទេស និងជាប្រធានរដ្ឋសភារហូតមកដល់បច្ចុប្បន្ននេះ ៕