នាង គន្ធា ថ្លែងអំណរគុណសម្តេចទាំងទ្វេ ជួយបច្ច័យបុណ្យគម្រប់ខួប ៧ ថ្ងៃបងប្រុស

តារាចម្រៀងកញ្ញា នាង គន្ធា ដែលត្រូវជាប្អូនស្រីបង្កើតរបស់តារាចម្រៀងប្រុសលោក នាង ប្រាក់សុគន្ធ បានថ្លែងអំណរគុណយ៉ាងជ្រាវជ្រៅជូនចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានជួយឧបត្ថម្ភផ្ដល់បច្ច័យបុណ្យខួប ៧ ថ្ងៃ បងប្រុសរបស់នាងចំនួន ១០ លានរៀល។

តារាចម្រៀង នាង គន្ធា បានលើកឡើងថា នាង​សូមសូមគោរពអរគុណយ៉ាងក្រៃលែងចំពោះសម្តេចតេជោ ហ៊ុន សែន និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានចូលរួមរំលែកទុក្ខ និងចូលរួមបុណ្យនូវទឹកប្រាក់ ១០ លានរៀលក្នុងកម្មវិធីបុណ្យ ៧ ថ្ងៃ​របស់បងប្រុសរបស់ខ្លួន​ គឺ លោក នាង ប្រាក់សុគន្ធ ដោយបានដឹកនាំដោយលោកអភិបាល​រងខេត្ត​បាត់ដំបង និងលោកអភិបាលស្រុកសំឡូត។

កញ្ញា នាង គន្ធា បានលើកឡើងទៀតថា ក្នុងឆ្នាំ​ថ្មី​ ២០២២ នេះនាង និងក្រុម​គ្រួសារបួងសួងសូមសម្តេចទាំងពីរមានសុខភាពល្អ កម្លាំងមាំមួន និងមានអាយុយឺនយូរក្នុង​ការ​ដឹកនាំប្រទេស។

គួររំលឹកថា តារាចម្រៀងវ័យក្មេង នាង ប្រាក់សុគន្ធ បានជួបនូវគ្រោះថ្នាក់ចរាចរណ៍កាលពីរំលងអធ្រាត្រឈានចូលថ្ងៃទី ២៥ ខែធ្នូ ឆ្នាំ ២០២១ ក្រោយចេញពីច្រៀងនៅហាងសាច់អាំង ក្បែរច្រមុះជ្រូកស្ទឹងមានជ័យ បណ្តាលឱ្យស្លាប់ក្រោយបញ្ចូនដល់មន្ទីពេទ្យ។ ចំណែកពិធីបុណ្យគំរប់ ៧ ថ្ងៃបានធ្វើឡើងរួចរាល់ហើយ នៅស្រុកកំណើត ភូមិព្រៃរំចេក ឃុំតាសាញ ស្រុកសំឡូត ខេត្តបាត់ដំបង៕

អត្ថបទ៖ ចាន់រ៉ា