កីឡា

ម្ចាស់ផ្ទះវៀតណាម គ្រោងបើកឲ្យទស្សនិកជនចូលទស្សនាស៊ីហ្គេម គ្រប់ប្រភេទកីឡាដោយមិនគិតថ្លៃ

បានផុស

៣ years មុន

នៅ

ថ្ងៃព្រហស្បតិ៍ ២១ មេសា ២០២២

ដោយ

គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣១ នៅប្រទេសវៀតណាម បានជំរុញឱ្យប្រជាពលរដ្ឋមកទស្សនាការប្រកួតកីឡានានាដោយមិនគិតថ្លៃ។

នោះគឺជាសំណើមួយក្នុងចំណោមសំណើរបស់គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣១ ទៅកាន់គណៈកម្មការរៀបចំនៅតាមខេត្តនីមួយៗ អំពីផែនការនេះ។

នៅថ្ងៃទី១៥ ខែមេសា គណៈកម្មការរៀបចំស៊ីហ្គេម ហៅកាត់ (BTC) បានចេញសេចក្តីជូនដំណឹងដល់មូលដ្ឋានអំពីរបៀបគ្រប់គ្រងការចេញលិខិតអញ្ជើញ ឬសំបុត្រចូលរួមព្រឹត្តិការណ៍នានា។ នៅក្នុងនោះ BTC បានសង្កត់ធ្ងន់លើការលើកទឹកចិត្ត ទៅកាន់អ្នករៀបចំនៅតាមខេត្តនីមួយៗ ដើម្បីបង្កើតលក្ខខណ្ឌសម្រាប់អ្នកចូលរួមទស្សនាការប្រកួតដោយឥតគិតថ្លៃ នេះនឹងបង្ហាញពីស្មារតីកីឡា ស្របតាមបាវចនាថា ‘សម្រាប់អាស៊ីអាគ្នេយ៍កាន់តែខ្លាំងឡើង’។

អ្នកគាំទ្រទាំងអស់គ្នានឹងមានឱកាសដ៏អស្ចារ្យដើម្បីទស្សនាអត្តពលិកប្រកួតដោយមិនគិតថ្លៃ នៅក្នុងកីឡដ្ឋាន។ នេះនឹងជួយទាក់ទាញអ្នកទស្សនាឱ្យចូលរួមក្នុងព្រឹត្តិការណ៍កីឡាស៊ីហ្គេម លើកទី៣១ ក៏ដូចជាភ្ញៀវទេសចរទៅកាន់ទីកន្លែងដែលការប្រកួតត្រូវបានប្រារព្ធឡើងផងដែរ។ សេចក្តីប្រកាសខាងក្រោមនឹងរួមបញ្ចូលព័ត៌មានអំពីកន្លែងដែលត្រូវទទួលបានសំបុត្រឥតគិតថ្លៃ ឬកន្លែងដែលត្រូវទិញសំបុត្រ (ប្រសិនបើមាន)។

យ៉ាងណាក៏ដោយជាមួយនឹងការបើកអនុញ្ញាតឱ្យចូលទស្សនា ក្រសួងសុខាភិបាល ក៏បានណែនាំទស្សនិកជនទាំងអស់ តម្រូវមានការពាក់ម៉ាស មានទឹកអាកុល ឬក៏ជែលលាងដៃជាប់ខ្លួន និងរក្សាគម្លាតផងដែរ ដើម្បីការពារទៅនឹងជំងឺកូវីដ-១៩ ដែលនៅតែបន្តរីករាលដាលក្នុងប្រទេស។

ព្រឹត្តិការណ៍ស៊ីហ្គេម លើកទី៣១ នៅប្រទេសវៀតណាម នេះនឹងមានកីឡាចំនួន ៤០ប្រភេទដាក់ឱ្យប្រកួត ស្មើនឹង ៥២៦វិញ្ញាសា ហើយមានរដ្ឋធានី-ខេត្ត ចំនួន១២ ត្រូវបានរៀបចំសម្រាប់ធ្វើជាទីតាំងប្រកួត មានដូចជារដ្ឋធានី Hanoi, ខេត្ត Bac Giang, Bac Ninh, Ha Nam, Hai Duong, Hoa Binh, Vinh Phuc, Phu Tho, Hai Phong, Nam Dinh, Ninh Binh និង Quang Ninh។ ខេត្តទាំង ១១នេះសុទ្ធតែមានទីតាំងក្បែរៗ និងជុំវិញទីក្រុងហាណូយ៕

ប្រភព៖ seagames2021.com

អត្ថបទ ៖ មន្នីរ័ត្ន