លទ្ធផលប្រកួតផលិតវីដេអូខ្លីស្តីអំពីចំណេះដឹងហិរញ្ញវត្ថុឆ្នាំ ២០២២ ប្រកាសនៅថ្ងៃស្អែក

ក្រុមឬទ្ធិពល សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា ក្រុមហ៊ុនក្រេឌីត ប្យូរ៉ូ សហការរៀបចំដោយ​ក្រុមហ៊ុនវីសា នឹងប្រកាសលទ្ធផលការប្រកួតផលិតវីដេអូខ្លីស្តីពី«ចំណេះដឹងហិរញ្ញវត្ថុ» នៅរសៀលថ្ងៃទី ១៧ ខែ មិថុនា ឆ្នាំ ២០២២ នៅសណ្ឋាគាររ៉ាហ្វលឡឺរ៉ូយ៉ាល់។

បើតាមសេចក្តីប្រកាស បានឱ្យដឹងថា អ្នកប្រកួតប្រជែងទាំងអស់មានចំនួន ២១ ក្រុម បានផ្ញើសាច់រឿង ដើម្បីចូលរួម​ប្រកួត។ ក្នុងនោះ ១៣ក្រុម បានជាប់វគ្គសរសេរសាច់រឿង និង ១០ក្រុមផលិតវីដេអូ ដាក់ប្រកួត។ ជាលទ្ធផល នឹងមានបីក្រុមទទួលបានជ័យលាភី។

សម្រាប់ជ័យលាភីលេខ១ ទទួលបាន ៨លានរៀល លេខ២ ៦លានរៀល និងលេខ៣ ទទួលបាន ៤លានរៀល។ ក្រៅពីប្រាក់រង្វាន់ក្រុមជ័យលាភី ក៏ទទួលបានរង្វាន់ លិខិតសរសើរ និងឱកាសការងារផ្សេងៗទៀត។

សូមបញ្ជាក់ថា នេះគឺជាលើកទី២ហើយ ក្នុងការប្រកួតផលិតវីដេអូខ្លី ដែលរៀបចំដោយស្ថាប័នខាងលើ។ កាលពីឆ្នាំ ២០២១ ក្រុមឬទ្ធិពល សហការជាមួយសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា បានរៀបចំកម្មវិធីនេះ ក្នុងគោលបំណងផ្សព្វផ្សាយអំពីចំណេះដឹងហិរញ្ញវត្ថុឱ្យកាន់តែបានទូលាយទៅប្រជាពលរដ្ឋខ្មែរ៕