អគ្គិភ័យឆេះផ្សារត្រែងទាំងកណ្ដាលអធ្រាត្រអស់ជិត ១០ តូប

តូបលក់ទំនិញក្នុងផ្សារត្រែង ចំនួន៨តូប ត្រូវបានអគ្គិភ័យឆាបឆេះគ្មានសល់ ដែលបង្កឲ្យមានការចលាចលទាំងកណ្តាលអធ្រាត្រ ដោយសារឆ្លងចរន្តអគ្គិសនី។

ហេតុការណ៍នេះបានកើតឡើង នៅថ្ងៃទី៨ ខែកក្កដា ឆ្នាំ២០២២ វេលាម៉ោង១និ១០នាទី រំលងអធ្រាត្រ ស្ថិតនៅក្នុងផ្សារត្រែង ក្នុងភូមិសាស្ត្រភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង ។

បើតាមប្រភពពីប្រជាពលរដ្ឋបានបញ្ជាក់ថា ដំបូងគេបានឮសម្លេងផ្ទុះ បន្ទាប់មកក៏ស្រាប់តែមានអណ្តាតភ្លើងចាប់ផ្តើមឆាបឆេះតែម្តង ហើយអណ្តាតភ្លើងនេះបានឆេះរាលដាលបន្តទៅតូបផ្សេងៗទៀតដែលនៅក្នុង បង្កអោយមានភាពវឹកវរទាំងយប់ ដោយសារតែរថយន្តពន្លត់អគ្គិភ័យមិនទាន់ទៅដល់។

ប្រភពដដែលបានសន្និដ្ឋានថា មូលហេតុគឺអាចឆ្លងចរន្តអគ្គិសនី ដែលតូបទាំង៨នោះមានម្ចាស់ ១.ឈ្មោះ ថុង បូរី ភេទប្រុស អាយុ២៩ឆ្នាំ(២តូប) ។​ ២. ហែម គឹមលាង ភេទស្រី អាយុ៦៥ឆ្នាំ(១តូប) ។ ៣.ឈ្មោះ សេន ប៉ាក់ ភេទស្រី អាយុ៦៣ឆ្នាំ(តូប២)។ ៤.ឈ្មោះ ហុក សុខឡូន ភេទប្រុស អាយុ៣៨ឆ្នាំ(២តូប)។ ៥.ឈ្មោះតៃ ចិន្ដា ភេទប្រុស អាយុ២៥ឆ្នាំ(១តូប)។

អ្នកទាំងអស់គ្នាស្នាក់នៅភូមិភ្ជាវ ឃុំត្រែង ឃុំត្រែង ស្រុករតនមណ្ឌល ខេត្តបាត់ដំបង ។ ដោយករណីនេះមិនបណ្តាលអោយមានរងរបួសមនុស្សនោះទេ ៕

អត្ថបទ៖ សោ និយមរ័ត្ន