អាមេរិក បង្កើនល្បឿនលក់អាវុធឲ្យសម្ព័ន្ធមិត្ត ព្រោះខ្លាចចាញ់ ចិន និងរុស្ស៊ី

បើតាមមន្ត្រីការពារជាតិជាន់ខ្ពស់របស់សហរដ្ឋអាមេរិកបានប្រាប់កាសែត Wall Street Journal ថា ភាពតានតឹងដែលកំពុងកើនឡើងជាមួយចិន និងជម្លោះនៅអ៊ុយក្រែនបានជំរុញឲ្យមន្ទីរបញ្ចកោណបង្កើតក្រុមការងារពិសេសមួយដើម្បីជួយសម្រួលដល់ការលក់អាវុធទៅឲ្យសម្ព័ន្ធមិត្តរបស់ទីក្រុងវ៉ាស៊ីនតោន ។

កាសែត Wall Street Journal (WSJ) បាននិយាយនៅក្នុងអត្ថបទរបស់ខ្លួនដែលបានចេញផ្សាយកាលពីពេលកន្លងទៅថា ក្រុមការងារពិសេសនោះឈ្មោះថា “ក្រុមខ្លា” ត្រូវបានដាក់បញ្ចូលគ្នានៅក្នុងខែសីហា ដើម្បីស្វែងរកមធ្យោបាយក្នុងការចែកចាយអាវុធដែលផលិតដោយសហរដ្ឋអាមេរិកទៅកាន់អ្នកទិញបរទេសឲ្យបានកាន់តែលឿន ។

មន្ត្រីបានប្រាប់ WSJ ទៀតថា ស្ថាប័ន​ថ្មី​នេះ​ត្រូវ​បាន​សហការបង្កើតឡើង​ដោយ​អនុរដ្ឋលេខាធិការ​ការពារ​ជាតិចំនួន ២ ​រូប ខណៈ​ដែល​ក៏​រួម​បញ្ចូល​ទាំង​តំណាង​មក​ពី​សេវាកម្ម​ផ្សេងៗ​របស់​មន្ទីរបញ្ចកោណ​ផង​ដែរ ហើយគំនិតនេះត្រូវបានចាប់ផ្តើម បន្ទាប់ពីការកើនឡើងភាពតានតឹងជាមួយចិនជុំវិញកោះតៃវ៉ាន់ និងតម្រូវការក្នុងការបំពេញឃ្លាំងអាវុធរបស់សម្ព័ន្ធមិត្តអាមេរិកនៅអឺរ៉ុបដែលកំពុងមានហានិភ័យ ដោយសារតែការផ្គត់ផ្គង់អាវុធដល់អ៊ុយក្រែន ចំពេលមានជម្លោះជាមួយរុស្ស៊ី ។

ទន្ទឹមនោះ ទីក្រុងវ៉ាស៊ីនតោនក៏មានការព្រួយបារម្ភដែរថា តម្លៃខ្ពស់ និងដំណើរការដ៏ស្មុគស្មាញ ជាពិសេសភាពយឺតយ៉ាវសម្រាប់ការលក់អាវុធ ដែលត្រូវបានអនុវត្តដោយមន្ទីរបញ្ចកោណក្រោមការត្រួតពិនិត្យរបស់ក្រសួងការបរទេស និងសភា បាននឹងកំពុងធ្វើឲ្យសហរដ្ឋអាមេរិកមានគុណវិបត្តិ ជាពិសេសភ័យខ្លាចចាញ់ក្នុងការប្រកួតប្រជែងជាមួយចិន និងរុស្ស៊ី ។

ជាចុងក្រោយកាសែត WSJ បាននិយាយថា បញ្ហាមួយទៀតដែលអាចធ្វើឲ្យស្មុគស្មាញដល់ដំណើរនៃការលក់អាវុធទៅបរទេសរបស់អាមេរិកនោះ គឺការខ្វះខាតនៃស្តុកអាវុធ និងគ្រាប់រំសេវផ្ទាល់ខ្លួនរបស់ទីក្រុងវ៉ាស៊ីនតោន ដោយសារតែជំនួយយោធារាប់ពាន់លានដុល្លារបានផ្តល់ទៅឲ្យរដ្ឋាភិបាលទីក្រុងកៀវ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ សម្ព័ន្ធមិត្ត ពូទីន ថា លោកខាងលិចកំពុង “លេងអុកមរណៈ” ជាមួយ រុស្ស៊ី