ឥណ្ឌា ថា មហិច្ឆតាសេដ្ឋកិច្ច ចិន អាចប្រឈមភាពឯកោនៅលើពិភពលោក

មហាសេដ្ឋីឥណ្ឌាលោក Gautam Adani បាននិយាយថា ចិនអាចក្លាយទៅជាប្រទេសឯកោមួយ និងមានបញ្ហាជាប់គាំងអចលនទ្រព្យលំនៅដ្ឋាន ក៏ដូចជាហានិភ័យឥណទានដែលស្រដៀងទៅនឹងមហិច្ឆតារបស់ប្រទេសជប៉ុនកាលពីទសវត្សឆ្នាំ ៩០ ។

ក្នុងសន្និសិទ្ឌ CEO ពិភពលោកលើកទី ២០ របស់ទស្សនាវដ្ដី Forbes នៅប្រទេសសិង្ហបុរី, លោក Gautam Adani ប្រធានក្រុមហ៊ុន Adani Group លើកឡើងថា ការកើនឡើងនៃបញ្ហាជាតិនិយម ការបន្ថូរបន្ថយខ្សែសង្វាក់ផ្គត់ផ្គង់ និងការរឹតបន្តឹងបច្ចេកវិទ្យារបស់ចិន ទំនងជាប៉ះពាល់ដល់ទំនាក់ទំនងសេដ្ឋកិច្ចជាមួយប្រទេសដទៃផ្សេងទៀតផង ។

បន្ថែមពីនេះ គំនិតផ្តួចផ្តើមខ្សែក្រវ៉ាត់ និងផ្លូវដែលបង្ហាញពីមហិច្ចតាភ្ជាប់ពិភពលោករបស់ចិនក៏នឹងត្រូវមានការប្រឆាំងផងដែរ ហើយការប្រឆាំងនេះ គឺបង្ហាញឲ្យឃើញពីការបន្ថែមបញ្ហាមួយទៀតដល់ទីក្រុងប៉េកាំង ។

ស្របពេលជាមួយគ្នានេះលោក Adani រំពឹងថា ចិនដែលជាប្រទេសឈានមុខគេមួយនៃសកលភាវូបនីយកម្ម នឹងកាន់តែមានអារម្មណ៍ឯកោខ្លាំងបន្ថែមទៀត ដោយសារតែវិបត្តិទាំងនោះ ។

គួរបញ្ជាក់ថា លោក Guatam Adani ដែលជាប្រធានក្រុមហ៊ុន Adani Group គឺជាមហាសេដ្ឋីឥណ្ឌា ដែលកាន់កាប់កំពង់ផែដ៏ធំមួយក្នុងប្រទេស និងមានទ្រព្យសម្បត្តិសរុបជាង ១៤២ ពាន់លានដុល្លារ ៕

ប្រែសម្រួលដោយ ៖ នាង រតនៈ

ប្រភព ៖ SCMP

ចុចអាន ៖ អាមេរិក ងាកទៅបញ្ចុះបញ្ចូល ឥណ្ឌា ចំពេលតានតឹងជាមួយ ចិន