មេបក្សកាន់អំណាច កូរ៉េខាងត្បូង ថា “គ្រាប់បែកនុយក្លេអ៊ែរ កូរ៉េខាងជើង អាចធ្លាក់លើក្បាលយើងគ្រប់ពេល”

មេដឹកនាំគណបក្សកាន់អំណាចកូរ៉េខាងត្បូងលោក Chung Jin-suk បានព្រមានកាលពីថ្ងៃពុធថា “កូរ៉េខាងជើងអាចបន្តទៅមុខទៀតប្រឆាំងនឹងទីក្រុងសេអ៊ូល ហើយគ្រាប់បែកនុយក្លេអ៊ែរអាចធ្លាក់លើក្បាលរបស់យើងគ្រប់ពេលវេលា” ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chung ក៏បានអំពាវនាវឲ្យលុបចោលកិច្ចព្រមព្រៀងយោធាជាមួយទីក្រុងព្យុងយ៉ាង រួមទាំងកិច្ចព្រមព្រៀងយោធាអន្តរកូរ៉េឆ្នាំ ១៩៩១ និង ២០១៨ ក៏ដូចជាសេចក្តីថ្លែងការណ៍រួមស្តីពីការរំសាយអាវុធនុយក្លេអ៊ែរនៅឧបទ្វីបកូរ៉េផងដែរ ប្រសិនបើកូរ៉េខាងជើងអនុវត្តការសាកល្បងនុយក្លេអ៊ែរលើកទី ៧ របស់ខ្លួន ។

លោក Chung បាននិយាយនៅលើការបង្ហោះ Facebook របស់ខ្លួនថា “មេដឹកនាំកូរ៉េខាងជើងលោក គីម ជុងអ៊ុន បានបង្ហាញអង្គភាពប្រតិបត្តិការនុយក្លេអ៊ែរយុទ្ធសាស្ត្ររបស់កូរ៉េខាងជើងកាលពីថ្ងៃទី ១០ ខែតុលា ដែលជាខួបនៃការបង្កើតគណបក្សពលករ ហើយគោលដៅរបស់ទីក្រុងព្យុងយ៉ាងគឺព្រលានយន្តហោះ និងកំពង់ផែនៃកូរ៉េខាងត្បូង ។

សេចក្តីថ្លែងការណ៍របស់មេដឹកនាំគណបក្សអំណាចប្រជាជន (PP) ដែលកំពុងកាន់អំណាចបានធ្វើឡើង បន្ទាប់ពីការព្រមានរបស់លោកប្រធានាធិបតី Yoon Suk-yeol កាលពីថ្ងៃអង្គារថា ប្រទេសកូរ៉េខាងជើងកំពុងគំរាមកំហែងដល់ពិភពលោកដោយការអភិវឌ្ឍ និងជំរុញអាវុធនុយក្លេអ៊ែររបស់ខ្លួនជាបន្តបន្ទាប់ ។

កាលពីថ្ងៃចន្ទ ប្រទេសកូរ៉េខាងជើងបាននិយាយថា ការសាកល្បងកាំជ្រួចមីស៊ីលនាពេលថ្មីៗនេះ គឺជាផ្នែកនៃសមយុទ្ធ “នុយក្លេអ៊ែរយុទ្ធសាស្ត្រ” រយៈពេល ២ សប្តាហ៍របស់ខ្លួន ដើម្បីត្រាប់តាមការវាយប្រហារលើកូរ៉េខាងត្បូងដោយអាវុធនុយក្លេអ៊ែរ ។

គួរបញ្ជាក់ថា ភាពតានតឹងនៅលើឧបទ្វីបកូរ៉េបានកើនឡើងក្នុងឆ្នាំ ២០២០ នៅពេលដែលកូរ៉េខាងជើងបានវាយប្រហារ និងបំផ្ទុះការិយាល័យទំនាក់ទំនងអន្តរកូរ៉េនៅតាមព្រំដែន ។ ភ្លាមៗនោះទីក្រុង​សេអ៊ូល​បាន​គំរាម​ឆ្លើយ​តប​យ៉ាង​ខ្លាំង ​ប្រសិន​បើ​ក្រុង​ព្យុងយ៉ាងធ្វើ​ឲ្យ​ស្ថានការណ៍​កាន់តែ​អាក្រក់​ទៅ​ទៀត ។ ទោះជាយ៉ាងណាក៏ដោយ ភាពតានតឹងបានកើនឡើងបន្ថែមទៀតនាពេលថ្មីៗនេះ បន្ទាប់ពីទីក្រុងសេអ៊ូល និងវ៉ាស៊ីនតោនបានធ្វើសមយុទ្ធយោធារួមគ្នា ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ កូរ៉េ​ខាង​ជើង​ ​បាញ់មីស៊ីលរយៈចម្ងាយឆ្ងាយ ​ដែល​អាច​ផ្ទុក​អាវុធ​នុយក្លេអ៊ែរ​