កូរ៉េខាងជើង គំរាមអាមេរិក និងកូរ៉េខាងត្បូង ឲ្យបញ្ឈប់សមយុទ្ធយោធារួមគ្នា ជាបន្ទាន់

ប្រទេសកូរ៉េខាងជើងនៅថ្ងៃអង្គារទី០១ខែវិច្ឆិកានេះ បានទាមទារឲ្យសហរដ្ឋអាមេរិក និងកូរ៉េខាងត្បូង បញ្ឈប់សមយុទ្ធយោធាទ្រង់ទ្រាយធំជាបន្ទាន់ ដោយហៅលំហាត់នេះថា ជាការបង្កហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសកូរ៉េខាងជើង បាននិយាយនៅក្នុងសេចក្តីថ្លែងការណ៍មួយថា “ជាថ្មីម្តងទៀត ស្ថានការណ៍នៅឧបទ្វីបកូរ៉េ និងតំបន់ជុំវិញ បានឈានចូលដល់ដំណាក់កាលប្រឈមមុខដាក់គ្នាយ៉ាងធ្ងន់ធ្ងរ ដើម្បីដណ្តើមអំណាច ដោយសារតែចលនាយោធាឥតឈប់ឈរ និងមិនប្រុងប្រយ័ត្នរបស់សហរដ្ឋអាមេរិក និងកូរ៉េខាងត្បូង”។

សេចក្តីថ្លែងការណ៍របស់ក្រសួងគំរាមថា កូរ៉េខាងជើង បានត្រៀមខ្លួនរួចជាស្រេច ដើម្បីចាត់វិធានការចាំបាច់ទាំងអស់ សម្រាប់ការពារអធិបតេយ្យភាព សន្តិសុខរបស់ប្រជាជន និងបូរណភាពទឹកដីពីការគំរាមកំហែងពីខាងក្រៅ។

ប្រសិនបើសហរដ្ឋអាមេរិកនៅតែបន្តការបង្កហេតុខាងយោធាយ៉ាងធ្ងន់ធ្ងរនោះ កូរ៉េខាងជើងនឹងពិចារណាលើវិធានការតាមដានដ៏មានឥទ្ធិពលបន្ថែមទៀត។ ប្រសិនបើសហរដ្ឋអាមេរិកមិនចង់ឲ្យមានការវិវឌ្ឍន៍ធ្ងន់ធ្ងរណាមួយ ដែលមិនសមស្របនឹងផលប្រយោជន៍សន្តិសុខរបស់ខ្លួនទេនោះ ពួកគេគួរតែបញ្ឈប់សមយុទ្ធគ្មានប្រយោជន៍ និងគ្មានប្រសិទ្ធភាពនេះ។ បើមិនដូច្នេះទេ ពួកគេនឹងត្រូវទទួលការស្តីបន្ទោសទាំងស្រុងចំពោះផលវិបាកទាំងអស់។

គួរបញ្ជាក់ថា សហរដ្ឋអាមេរិក និងកូរ៉េខាងត្បូង បានចាប់ផ្តើមសមយុទ្ធដែនអាកាសរួមគ្នាធំបំផុតមិនធ្លាប់មាន កាលពីថ្ងៃចន្ទ ដោយយន្តហោះចម្បាំងរាប់រយគ្រឿង មកពីប្រទេសទាំងពីរ បានហាត់វាយប្រហាររយៈពេល ២៤ម៉ោងក្នុងមួយថ្ងៃ។

កងទ័ពអាកាសអាមេរិកបាននិយាយថា ប្រតិបត្តិការនេះហៅថា Vigilant Storm នឹងដំណើរការរហូតដល់ថ្ងៃសុក្រ ហើយនឹងមានការចូលរួមពីសំណាក់យន្តហោះចម្បាំងប្រហែល២៤០គ្រឿង ដែលធ្វើប្រតិបត្តិការប្រហែលហោះហើរប្រមាណ ១៦០០ជើង។

ទីក្រុងវ៉ាស៊ីនតោន និងសេអ៊ូល ជឿជាក់ថា ទីក្រុងព្យុងយ៉ាង ប្រហែលជានឹងចាប់ផ្តើមការសាកល្បងគ្រាប់បែកនុយក្លេអ៊ែរឡើងវិញ ជាលើកដំបូងចាប់តាំងពីឆ្នាំ២០១៧មក ហើយបានប្រកាន់យកនូវយុទ្ធសាស្ត្ររារាំងទីក្រុងព្យុងយ៉ាង តាមរយៈសមយុទ្ធយោធាសំខាន់ៗ៕

ប្រែសម្រួល៖ Vann Vann

ប្រភព៖ CNA

ចុចអាន៖ យន្តហោះចម្បាំងអាមេរិក និងកូរ៉េខាងត្បូង ចាប់ផ្តើមធ្វើសមយុទ្ធដែនអាកាស ធំបំផុតមិនធ្លាប់មាន