រដ្ឋមន្ត្រីសុខាភិបាល ស្នើគិលានុបដ្ឋាកប្រកាន់ខ្ជាប់វិជ្ជាជីវៈ និងក្រមសីលធម៌ខ្ពស់ក្នុងការផ្តល់សេវាថែ​ទាំជូនអ្នកជំងឺ

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានស្នើឱ្យគិលានុបដ្ឋាក​ទាំងអស់ត្រូវប្រកាន់ខ្ជាប់នូវឥរិយាបទ​ជាអ្នកប្រកបវិជ្ជាជីវៈប្រកប​ដោយក្រមសីលធម៌ខ្ពស់ និងមាន​សមត្ថភាពក្នុងការផ្តល់សេវាថែទាំជូនអ្នកជំងឺ។

ថ្លែងបើកសន្និបាតសមាគមគិលានុបដ្ឋាកកម្ពុជាឆ្នាំ២០២២ ស្តីពីតួនាទីរបស់គិលានុបដ្ឋាក ក្នុងការលើកកម្ពស់ការថែទាំដោយផ្តោតលើអតិថិជន និងអ្នកជំងឺនៅសណ្ឋាគារភ្នំពេញនៅថ្ងៃទី០៩ធ្នូនេះ លោករដ្ឋមន្ត្រីបានមានប្រសាសន៍ថា គិលានុ​បដ្ឋាកជាបេះដូងនៃការផ្តល់សេវាដែលមានគុណភាព និងសុវត្ថិភាពដល់អ្នកជំងឺ និងអតិថិជននិងជាអ្នកផ្តល់សេវាទាំងផ្លូវកាយ ផ្លូវចិត្ត សង្គម និងតាមជំនឿសាសនា និងការថែទាំដោយផ្តោតលើអតិថិជន។

លោករដ្ឋមន្ត្រីបានបន្តថា ម៉្យាងវិញទៀតគិលានុបដ្ឋាកគឺជាសមាជិកក្នុងសហគមន៍ដែលគាត់បម្រើការហើយគាត់មានឥទ្ធិពល​ក្នុងការផ្លាស់ប្តូរឥរិយាបថអតិថិជន ស្របតាមក្រមសីលធម៌គិលានុបដ្ឋាកផងដែរ។ លោករដ្ឋមន្ត្រី បានលើកឡើងថា កិច្ចការយ៉ាងសកម្មរបស់គិលានុបដ្ឋាកជាកម្លាំងចលករនៅក្នុងប្រព័ន្ធសុខាភិបាលទាំងមូលក្នុងការចូលរួមចំណែកលើកកម្ពស់គុណភាព សុវត្ថិភាពនិងសមធម៌នៅកម្ពុជា។

លោករដ្ឋមន្ត្រីបានស្នើឱ្យវប្បធម៌នៃការចូលរួមចំណែកក្នុងការចែករំលែកចំណេះដឹងរបស់គិលានុបដ្ឋាក ស្ថិតនៅជាប្រព័ន្ធ
គ្រប់គ្រឹះស្ថានសុខាភិបាលទាំងអស់ដែលឆ្ពោះទៅរកភាពប្រសើរឡើងក្នុងការផ្តល់សេវាថែទាំដែល មានគុណភាព សុវត្ថិ​ភាព និងសមធម៌ដល់អតិថិជននិងអ្នកជំងឺ៕

អត្ថបទ៖ សំអឿន