រុស្ស៊ី មិនអាចរក្សាទំនាក់ទំនាក់ធម្មតាជាមួយ អាមេរិក ទៀតទេ ក្រោមការ​គ្រប់គ្រងរបស់លោក Biden

រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយនៅក្នុងបទសម្ភាសន៍ជាមួយសារព័ត៌មាន TASS ថា រុស្ស៊ី និងសហរដ្ឋអាមេរិកមិនអាចរក្សាទំនាក់ទំនង ឬផ្លូវសន្ទនាតាមបែបធម្មតាបានទៀតនោះទេ ដោយសារការប្រឈមមុខដាក់គ្នាដែលធ្វើឡើងដោយប្រធានាធិបតីអាមេរិក Joe Biden ។

លោក Lavrov បាននិយាយថា “ការរក្សាការសន្ទនាតាមបែបធម្មតាជាមួយរដ្ឋបាលរបស់លោក Biden គឺមិនអាចទៅរួចទេ ព្រោះថា ការប្រឈមមុខដាក់គ្នាប្រឆាំងនឹងរុស្ស៊ីរបស់ទីក្រុងវ៉ាស៊ីនតោន នៅតែបន្តលក្ខណៈធ្ងន់ធ្ងរ និងគ្រប់បែបយ៉ាង” ។

អ្នកការទូតកំពូលរបស់រុស្ស៊ីរូបនេះបានកត់សម្គាល់ថា “ទំនាក់ទំនងរុស្ស៊ី-អាមេរិកស្ថិតក្នុងស្ថានភាពដ៏គួរឲ្យសោកស្ដាយ ខណៈដែលរុស្ស៊ីស្ទើរតែបាត់បង់អ្វីគ្រប់យ៉ាងទៅហើយ ដោយសារតែទីក្រុងវ៉ាស៊ីនតោន” ។

លោក Lavrov បានកត់សម្គាល់ថា “យើងបានពន្យល់យ៉ាងខ្ជាប់ខ្ជួនដល់ជនជាតិអាមេរិកថា វាមិនមែនជារចនាប័ទ្មរបស់យើងក្នុងការបន្ទាបតម្លៃទំនាក់ទំនងអន្តររដ្ឋាភិបាលដោយចេតនានោះទេ” ។

ជាចុងក្រោយលោករដ្ឋមន្ត្រីការបរទេសរុស្ស៊ីបញ្ជាក់ថា “ទោះជាយ៉ាងណាក៏ដោយ យើងនៅតែបន្តពីគោលជំហរនៃភាពមានគ្នាទៅវិញទៅមកក្នុងកាលៈទេសៈណាក៏ដោយ នៅពេលដែលយើងនិយាយអំពីការកសាងកិច្ចសន្ទនា ហើយយើងនឹងធ្វើគ្រប់បែបយ៉ាងដើម្បីដោះស្រាយបញ្ហាទាំងនេះ” ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ បេឡារុស អាចប្រើមីស៊ីល Iskander និង S-400 របស់ រុស្ស៊ី គ្រប់ពេល ចាំបាច់ទាំងអស់