អភិបាលខេត្តប៉ៃលិន ណែនាំឲ្យពលរដ្ឋមានចម្ការមៀន ទាក់ទងទៅអាជ្ញាធរខេត្តចៀសវៀងការកេងចំណេញតម្លៃពីឈ្មួញកណ្ដាល

លោកស្រី បាន ស្រីមុំ អភិបាលនៃគណៈអភិបាលខេត្តប៉ៃលិន បានណែនាំឲ្យប្រជាពលរដ្ឋដែលមានចម្ការមៀន ត្រូវទាក់ទងទៅក្រុមការងាររដ្ឋបាលខេត្ត ដើម្បីបានលក់ចេញផ្ទាល់ជាក្រុមហ៊ុននាំចេញផ្លែមៀនប៉ៃលិនទៅប្រទេសចិន ចៀសវៀងការកេងចំណេញតម្លៃទីផ្សារពីឈ្មួញកណ្ដាល។

ក្នុងជំនួយបពិភាក្សាការងារជាមួយក្រុមហ៊ុន ឆាយណាជីនវ័រយាន អ៉ីមផតអិចផត ខេមបូឌា ជាក្រុមហ៊ុននាំចេញផ្លែមៀនប៉ៃលិនទៅប្រទេសចិន កាលពីព្រឹកថ្ងៃទី១៦ ខែមករា នេះ លោកស្រីអភិបាលខេត្តបានលើកឡើងថា ក្នុងខែមករានេះ តម្លៃទីផ្សារផ្លែមៀនប៉ៃលិន មានតម្លៃចាប់ពី ៣៥០០រៀល ទៅ ៤៥០០រៀល នៅខ្វះតម្រូវការជាច្រើនទៀត បើប្រជាពលរដ្ឋមានចម្ការមៀន ហើយមិនដឹងទំនាក់ទំនងលក់បាន អាចទាក់ទងមកក្រុមការងាររដ្ឋបាលខេត្ត ក្រុមការងាររង់ចាំជួយដើម្បីទំនាក់ទំនងជាមួយក្រុមហ៊ុនផ្ទាល់លក់ចេញបាន។

ជាមួយគ្នានេះដែរ លោកស្រីអភិបាលខេត្តក៏បានណែនាំឲ្យពលរដ្ឋមានការប្រុងប្រយ័ត្តចំពោះឈ្មួញកណ្តាល កេងចំណេញតម្លៃទីផ្សារមិនពិតប្រាកដ ដែលអាចឲ្យខាតបង់ទទួលបានតម្លៃខុសទីផ្សាររបស់ក្រុមហ៊ុន ។

អភិបាលខេត្តរូបនេះបានបន្ថែមថា ក្នុងនាមរដ្ឋបាលខេត្ត និងសហការី នឹងខិតខំចូលរួមគាំទ្រសហការជាមួយក្រុមហ៊ុនដើម្បីថែរក្សាតម្លៃទីផ្សារជូនប្រជាពលរដ្ឋអោយបានយូរអង្វែង។​ ដើម្បីងាយស្រួលដល់ប្រជាពលរដ្ឋក្នុងការទំនាក់ទំនងទៅក្រុមការងាររដ្ឋបាលខេត្ត លោកស្រីបានប្រកាសលេខទូរស័ព្ទពីរប្រព័ន្ធគឺ 0316095000 / 070338337៕

អត្ថបទ៖ សុខុម