អាមេរិក ចង់ស្តារទំនាក់ទំនងយោធា ជាមួយចិន ឡើងវិញ

យោងតាមលោក Kurt Campbell ដែលបម្រើការជាអ្នកសម្របសម្រួលសម្រាប់តំបន់ឥណ្ឌា និងប៉ាស៊ីហ្វិក នៃក្រុមប្រឹក្សាសន្តិសុខជាតិសេតវិមាន (NSC) បាននិយាយថា សហរដ្ឋអាមេរិកនឹងបន្តវិធីសាស្រ្តផ្នែកការទូត លើការស្ដារឡើងវិញនូវបណ្តាញទំនាក់ទំនងផ្ទាល់ជាមួយប្រទេសចិន ដើម្បីការពារឧប្បត្តិហេតុឬគ្រោះថ្នាក់នាពេលអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយពិភាក្សាអំពីផលប៉ះពាល់ជាយុទ្ធសាស្ត្រនិងផ្នែកយោធានៃសម្ព័ន្ធមិត្ត AUKUS រវាងអូស្ត្រាលី សហរដ្ឋអាមេរិក និងចក្រភពអង់គ្លេស នៅមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ (CSIS) កាលពីដើមសប្តាហ៍នេះ លោក Campbell និយាយថា វាមានសារសំខាន់ណាស់សម្រាប់ប្រទេសចិន និងសហរដ្ឋអាមេរិក ក្នុងការចាត់វិធានការជាក់ស្តែងដើម្បីអនុញ្ញាតឲ្យមានការប្រាស្រ័យទាក់ទងប្រកបដោយប្រសិទ្ធភាព ដើម្បីដោះស្រាយជាមួយនឹងកាលៈទេសៈដែលមិនមានចេតនាឬគ្រោះថ្នាក់ ឬគ្រោះមហន្តរាយ។

លោក​បន្ត​ថា “​យើង​នឹង​បន្ត​បញ្ជាក់​ពី​ហេតុផល​ដែលថា​ បណ្តាញទាំងនេះពិតជា​មាន​សារសំខាន់ ជា​ពិសេស​ពេល​ដែល​កងកម្លាំង​របស់​យើង ​កាន់តែប្រឈមមុខដាក់គ្នា ហើយ​ប្រតិបត្តិការ​នៅ​ជិត​គ្នា​”។

លោក Campbell បន្ថែមថា ដំណើរទស្សនកិច្ចផ្ទាល់របស់រដ្ឋមន្ត្រីការបរទេសអាមេរិក Antony Blinken ទៅកាន់ប្រទេសចិនកាលពីសប្តាហ៍មុន គឺជាជំហានដ៏ល្អ សម្រាប់ផ្នែកការទូត។

គួរបញ្ជាក់ជាថ្មី លោក Blinken បានក្លាយជារដ្ឋមន្ត្រីការបរទេសអាមេរិកដំបូងគេដែលធ្វើទស្សនកិច្ចនៅទីក្រុងប៉េកាំងក្នុងរយៈពេល៥ឆ្នាំ ចំពេលទំនាក់ទំនងរវាងប្រទេសទាំងពីរបានជួបប្រទះបញ្ហាមួយចំនួន ដូចជាស្ថានភាពផ្លូវច្បាប់របស់តៃវ៉ាន់ ក៏ដូចជាការកើនឡើងសកម្មភាពយោធារបស់ទីក្រុងវ៉ាស៊ីនតោននៅឥណ្ឌូប៉ាស៊ីហ្វិកផងដែរ៕

ប្រែសម្រួល៖ Vann Vann

ប្រភព៖ RT