លោក Biden នឹងចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រ​ជាមួយ វៀតណាម

សារព័ត៌មាន Politico បានរាយការណ៍ថា ប្រធានាធិបតីសហរដ្ឋអាមេរិកលោក Joe Biden នឹងចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រជាមួយប្រទេសវៀតណាម ក្នុងអំឡុងពេលដំណើរទស្សនកិច្ចផ្លូវរដ្ឋទៅកាន់ប្រទេសអាស៊ីអាគ្នេយ៍មួយនេះនៅពាក់កណ្តាលខែកញ្ញាខាងមុខ ។

សារព័ត៌មាន Politico បានរាយការណ៍ ដោយដកស្រង់ប្រភពចេញពីមនុស្សចំនួន ៣ រូបដែលដឹងអំពីផែនការនៃកិច្ចព្រមព្រៀងនេះថា កិច្ចព្រមព្រៀងនេះ នឹងអនុញ្ញាតឲ្យមានកិច្ចសហប្រតិបត្តិការទ្វេភាគីថ្មី ដែលនឹងជំរុញកិច្ចខិតខំប្រឹងប្រែងរបស់វៀតណាម ក្នុងការអភិវឌ្ឍវិស័យបច្ចេកវិទ្យាកម្រិតខ្ពស់ រួមទាំងការផលិតបន្ទះឈីបតូចៗ និងបច្ចេកវិទ្យា AI ផងដែរ ។

ទោះយ៉ាងណា លោក Biden ក៏កំពុងថ្លឹងថ្លែងចំពោះដំណើរទស្សនកិច្ចមកកាន់ប្រទេសវៀតណាមនាខែកញ្ញាខាងមុខនេះផងដែរ បើទោះជាប្រធានាធិបតីសហរដ្ឋអាមេរិករូបនេះធ្លាប់បានលើកឡើងកាលពីខែសីហាថា លោកនឹងធ្វើដំណើរទៅកាន់ប្រទេសវៀតណាម ដោយសារតែរដ្ឋាភិបាលទីក្រុងហាណូយចង់លើកកម្ពស់ទំនាក់ទំនងជាមួយសហរដ្ឋអាមេរិក និងចង់ក្លាយជាដៃគូដ៏សំខាន់ ។

ពាក់ព័ន្ធនឹងបញ្ហានេះដែរ នៅក្នុងកិច្ចប្រជុំមួយកាលពីខែមេសា លោកនាយករដ្ឋមន្ត្រីវៀតណាម Pham Minh Chinh និងរដ្ឋមន្ត្រីការបរទេសអាមេរិក លោក Antony Blinken ក៏បានសម្តែងនូវបំណងចង់ធ្វើឲ្យទំនាក់ទំនងប្រទេសទាំងពីរកាន់តែស៊ីជម្រៅផងដែរ ខណៈដែលទីក្រុងវ៉ាស៊ីនតោនស្វែងរកការពង្រឹងទំនាក់ទំនងជាមួយដៃគូក្នុងតំបន់អាស៊ី ដើម្បីទប់ទល់នឹងឥទ្ធិពលរបស់ប្រទេសចិន ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ កូរ៉េខាងជើង បញ្ចេញប្រព័ន្ធមីស៊ីលប្រឆាំងយន្តហោះថ្មី ដើម្បីកម្ចាត់ការ​ឈ្លានពានរបស់ អាមេរិក