ចិន ទាមទារឲ្យ អាមេរិក បញ្ឈប់ការគាំទ្រដល់កងកម្លាំងបំបែកខ្លួនដើម្បី “ឯករាជ្យតៃវ៉ាន់”

រដ្ឋ​មន្ត្រី​ការ​បរទេស​ចិន លោក Wang Yi បាន​ប្រាប់​រដ្ឋ​មន្ត្រី​ការ​បរទេស​អាមេរិក លោក Antony Blinken ក្នុង​ការ​ហៅ​ទូរសព្ទ​​ថា ទីក្រុង​វ៉ាស៊ីនតោន​ត្រូវ​តែ​បញ្ឈប់​ការ​គាំទ្រ​របស់​ខ្លួនទៅដល់​កង​កម្លាំង​បំបែក​ខ្លួន​ដែល​​កំពុង​អំពាវនាវ​ឲ្យ​មាន “ឯករាជ្យ​ភាព​​តៃវ៉ាន់” ។

ដោយដកស្រង់សម្ដីពីលោក Wang Yi, ក្រសួងការបរទេសចិនបាននិយាយនៅលើគេហទំព័ររបស់ខ្លួនថា “យើងទាមទារឲ្យសហរដ្ឋអាមេរិកបញ្ចៀសការជ្រៀតជ្រែកក្នុងកិច្ចការផ្ទៃក្នុងរបស់ប្រទេសចិន ក៏ដូចជាចេញពីការគាំទ្រកងកម្លាំងណាមួយដែលស្វែងរកឯករាជ្យភាពរបស់តៃវ៉ាន់ ជាពិសេសសូមចេញពីការរួមគំនិតជាមួយកងកម្លាំងបំបែកខ្លួនបែបនេះ” ។

ពាក់ព័ន្ធនឹងបញ្ហានេះដែរ កាល​ពី​ចុង​ខែ​វិច្ឆិកា លោក Chen Binhua អ្នកនាំពាក្យក្រុមប្រឹក្សារដ្ឋចិនទទួលបន្ទុកកិច្ចការកោះតៃវ៉ាន់ធ្លាប់បានព្រមានថា “ឯករាជ្យ​ភាព​សម្រាប់​តៃវ៉ាន់” នឹង​មាន​ន័យស្មើនឹងធ្វើ​សង្គ្រាម ហើយទីក្រុងប៉េកាំងនឹងមិនអត់ឱនចំពោះសកម្មភាពបំបែកខ្លួនពាក់ព័ន្ធនឹងកងកម្លាំងគាំទ្រឯករាជ្យតៃវ៉ាន់នោះឡើយ” ។

ជាយូរយាណាស់មកហើយ កោះតៃវ៉ាន់ត្រូវបានគ្រប់គ្រងដោយរដ្ឋបាលមូលដ្ឋានរបស់ចិន ចាប់តាំងពីឆ្នាំ ១៩៤៩ មកម្ល៉េះ ខណៈរដ្ឋាភិបាលទីក្រុងប៉េកាំងបានចាត់ទុកកោះនេះជា ខេត្តមួយក្នុងចំណោមខេត្តទាំងអស់របស់ខ្លួន ហើយទីតាំងនេះត្រូវបានគាំទ្រដោយប្រទេសភាគច្រើន រួមទាំងរុស្ស៊ីផងដែរ ។

៣០ ឆ្នាំក្រោយមក ពោលនៅឆ្នាំ ១៩៧៩ សហរដ្ឋអាមេរិកបានកាត់ផ្តាច់ទំនាក់ទំនងការទូតជាមួយភាគីតៃវ៉ាន់ ហើយបានទទួលស្គាល់ផ្នែកការទូតជាមួយសាធារណរដ្ឋប្រជាមានិតចិន ។ ប៉ុន្តែបើទោះបីជាទទួលស្គាល់ជាផ្លូវការនូវគោលនយោបាយចិនតែមួយក៏ពិតមែន ក៏សហរដ្ឋអាមេរិកនៅតែបន្តរក្សាទំនាក់ទំនងជាមួយរដ្ឋបាលក្រុងតៃប៉ិ និងផ្គត់ផ្គង់អាវុធដល់កោះនេះដដែល ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ចិន បបួលប្រទេសដែលជាសម្ព័ន្ធមិត្ត រុស្ស៊ី ចូលក្នុងគម្រោងគំនិតផ្ដួចផ្ដើម ខ្សែក្រវាត់ និងផ្លូវ