បង្ក្រាបទីតាំងនាំចូលសាច់ និងគ្រឿងក្នុងបង្កកគ្មានច្បាប់អនុញ្ញាត២ទីតាំង រកឃើញវត្ថុតាងជិត២ម៉ឺនគីឡូក្រាម

មន្ត្រីជំនាញនាយកដ្ឋាននគរបាលប្រឆាំងបទល្មើសសេដ្ឋកិច្ច កាលពីថ្ងៃទី២៦ ខែធ្នូ ឆ្នាំ២០២៣ បានសហការជាមួយមន្ត្រីជំនាញនាយកដ្ឋានសុខភាពសត្វ និងសុខភាពសាធារណៈបសុព្យាបាល រួមជាមួយអាជ្ញាធរខណ្ឌច្បារអំពៅ បានចុះបង្រ្កាបទីតាំងនាំចូល និងចែកចាយសាច់ និងគ្រឿងក្នុងបង្កកគ្មានច្បាប់អនុញ្ញាតចំនួន២ទីតាំង​ រកឃើញសាច់ និងគ្រឿងក្នុងបង្កកជិត២ម៉ឺនគីឡូក្រាម។

ប្រតិបត្តិការនេះបានធ្វើឡើងក្រោមការដឹកនាំសម្របសម្រួលនីតិវិធីផ្ទាល់ពីលោកព្រះរាជអាជ្ញារង ម៉ុត ដារ៉ា នៅចំណុច​ដីឡូតិ៍គ្មានលេខ ផ្លូវលំ សង្កាត់និរោធ ខណ្ឌច្បារអំពៅ និងមួយទីតាំងទៀតនៅចំណុចដីឡូតិ៍គ្មានលេខ ផ្លូវលេខ៥១ សង្កាត់និរោធ ខណ្ឌច្បារអំពៅ រាជធានីភ្នំពេញ។

ក្នុងប្រតិបត្តិការឆែកឆេរ សមត្ថកិច្ចបានរកឃើញវត្ថុតាងសាច់ជ្រូក សាច់គោ សាច់ទា សាច់មាន់ និងគ្រឿងក្នុងបង្កកសរុបទម្ងន់ ១៨,៨៤៨គីឡូក្រាម និងបាននាំខ្លួនជនសង្ស័យទាំង២នាក់ជាម្ចាស់ទីតាំង មកនាយកដ្ឋាន ដើម្បីសាកសួរបំភ្លឺតាមនីតិវិធី ចំណែកវត្ថុតាងបិទប្លុំបេរកុងទីន័រក្លាសេ្សទាំង២ទីតាំង៕