រដ្ឋាភិបាលប្រកាសផ្អាក នាំចូលគ្រឿងក្នុង និងបំណែកសាច់បង្កក

រាជរដ្ឋាភិបាលកម្ពុជាបានសម្រេចផ្អាកនាំចូលនូវគ្រឿងក្នុង និងបំណែកសាច់បង្កកមួយចំនួន ជាបណ្ដោះអាសន្នរយៈពេល ៦ ខែ។ ការសម្រេចបែបនេះ ដើម្បីធានាទីផ្សារសាច់សត្វក្នុងស្រុក ដែលកំពុងជួបបញ្ហាធ្លាក់ថ្លៃ។

សមាគមអ្នកចិញ្ចឹមសត្វកម្ពុជា កន្លងមកបានលើកឡើងថា ម្ចាស់កសិដ្ឋានចិញ្ចឹមសត្វនៅកម្ពុជាបានត្អូញត្អែរពីបញ្ហាលក់សត្វចិញ្ចឹមដូចជា គោ ជ្រូក បានតម្លៃទាប មិនរួចដើមថ្លៃផលិត។

សេចក្ដីប្រកាសព័ត៌មានរួមរវាងក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ ចេញផ្សាយនៅថ្ងៃទី ១២ ខែមករា ឆ្នាំ ២០២៤​នេះ បញ្ជាក់ថា វិធានការផ្អាកការនាំចូលជាបណ្តោះអាសន្ននេះនឹងចាប់ផ្ដើមអនុវត្តពីថ្ងៃទី ១២ ខែមីនា រហូត ដល់ថ្ងៃទី១២ ខែកញ្ញា ឆ្នាំ២០២៤ តែវិធានការនេះមិនអនុវត្តចំពោះគម្រោងវិនិយោគមានលក្ខណៈ សម្បត្តិគ្រប់គ្រាន់ (គ.ល.គ) ដែលនាំចូលទំនិញខាងលើ សម្រាប់ប្រើប្រាស់ជាធាតុចូលផលិតកម្ម សម្រាប់ការនាំចេញឡើយ។

កាលពីពេលថ្មីៗនេះ អគ្គនាយកដ្ឋានសុខភាពសត្វ និងផលិតកម្មសត្វ បានរៀបចំកិច្ចប្រជុំជាមួយសមាគម​អ្នកចិញ្ចឹម​សត្វ​នៅកម្ពុជា និងតំណាងក្រុមហ៊ុន ភាគីពាក់ព័ន្ធដើម្បីរកដំណោះស្រាយបញ្ហាតម្លៃសាច់សត្វក្នុងស្រុកធ្លាក់ចុះ។

លោក ស្រ៊ុន ពៅ ​ប្រធានសមាគមអ្នកចិញ្ចឹមសត្វកម្ពុជា ស្នើឱ្យម្ចាស់ក្រុមហ៊ុននៅកម្ពុជាដែលនាំចូលសាច់បង្កកពីបរទេស​ងាកមកគាំទ្រផលិតផលក្នុងស្រុក ខណៈតំណាងក្រុមហ៊ុនបានឯកភាព ព្រមទទួលទិញសាច់បង្កកក្នុងស្រុកមួយជំហានហើយ ភាគីពាក់ព័ន្ធកំពុងដាក់តម្លៃ ដើម្បីឱ្យត្រូវរ៉ូវគ្នា។ ជំហានដំបូងសមាគម ចង់បានតម្លៃរួចដើមថ្លៃផលិតដែលមានតម្លៃ ៩ ០០០ រៀល ក្នុង១ គីឡូ ដើម្បីទប់ទល់ការខាតបង់។

បើតាមសេចក្ដីប្រកាសរួមរបស់ក្រសួងពាណិជ្ជកម្ម និងក្រសួងកសិកម្មបញ្ជាក់ថា ប្រភេទគ្រឿងក្នុង និងបំណែកសាច់បង្កកដែលផ្អាកនាំចូលរួមមាន អណ្ដាតគោ អណ្ដាតក្របីបង្កក ថ្លើម និងគ្រឿងក្នុងជ្រូក មាន់ ផ្សេងៗទៀត៕