តើនរណានឹងក្លាយជានាយករដ្ឋមន្ត្រីថ្មី ប៉ាគីស្ថាន?

គណបក្សនយោបាយធំៗចំនួនពីររបស់ប្រទេសប៉ាគីស្ថាននៅថ្ងៃច័ន្ទ ទី១២ ខែកុម្ភៈ នេះ បានឈ្លោះគ្នាអំពី “តើអ្នកណាក្លាយជានាយករដ្ឋមន្ត្រី ” បន្ទាប់ពីការបោះឆ្នោត ដែលមានលក្ខខណ:មិនពេញលេញកាលពីសប្តាហ៍មុន ។ កត្តានេះបានបង្ខំឱ្យពួកគេចូលរួមកម្លាំង និងព្យាយាមបង្កើតក្រុមចម្រុះនៅក្នុងសភា ដែលគ្រប់គ្រងជាទម្រង់ឯករាជ្យរៀងៗខ្លួន ។

សកម្មភាពឈ្លោះប្រកែក និងវាយតប់គ្នា ដើណ្ដើមតំណែងជានាយករដ្ឋមន្ត្រីនេះ អាចនឹងធ្វើឱ្យមានការព្រួយបារម្ភកាន់តែខ្លាំងអំពីស្ថិរភាពរបស់ប្រទេសដែលជាប់គាំងនៅក្នុងវិបត្តិសេដ្ឋកិច្ច និងការប្រយុទ្ធប្រឆាំងនឹងការកើនឡើងនៃអំពើហិង្សារបស់ក្រុមសកម្មប្រយុទ្ធ។

ទន្ទឹមគ្នានេះដែរ នៅថ្ងៃច័ន្ទនេះ សន្ទស្សន៍ភាគហ៊ុនគោលរបស់ប្រទេសប៉ាគីស្ថានបានធ្លាក់ចុះ ៣.៤ ភាគរយដែលជាថ្ងៃដំបូងនៃការជួញដូរ បន្ទាប់ពីលទ្ធផលនៃការបោះឆ្នោតកាលពីថ្ងៃទី ៨ ខែកុម្ភៈ ។

សូមបញ្ជាក់ផងដែរថា អតីតនាយករដ្ឋមន្ត្រី Imran Khan និង Nawaz Sharif ទាំងពីរនាក់បានប្រកាសជ័យជម្នះ កាលពីថ្ងៃសុក្រ ដោយលោក Imran Khan ទទួលបានការគាំទ្រច្រើនជាងគេរហូតដល់ ៩៣ អាសនៈ ខណៈដែលគណបក្ស Pakistan Muslim League-Nawaz (PML-N) របស់លោក Nawaz Sharif ទទួលបាន ៧៥អាសន: ។

ត្បិតតែលោក Imran Khan ទទួលបានសំឡេងគាំទ្រច្រើន ប៉ុន្តែគាត់មិនអាចកាន់តំណែងជានាយករដ្ឋមន្ត្រីបានឡើយ ដោយសារគាត់កំពុងជាប់ក្នុងពន្ធនាគារ ហើយក្រុមរបស់គាត់ទៀតសោតក៏មិនអាចបង្កើតរដ្ឋាភិបាលបានដែរ ។

យ៉ាងណាមិញ នៅមានគណបក្សមួយទៀត ដែលមានសំឡេងគាំទ្រលេខរៀងទី៣ គឺគណបក្ស Pakistan Peoples Party (PPP) របស់លោក Bilawal Bhutto Zardari ដែលជាកូនប្រុសរបស់អតីតនាយករដ្ឋមន្ត្រី Benazir Bhutto ដែលត្រូវបានធ្វើឃាត ទទួលបាន ៥៤ អាសនៈ ដើម្បីប្រកួតប្រជែង ថាតើអ្នកណាជានាយករដ្ឋមន្ត្រីថ្មីរបស់ ប៉ាគីស្ថាន?

ជាមួយគ្នានេះ គណបក្សទាំងពីរ PML-N និង PPP បានបើកកិច្ចចរចាជាផ្លូវការកាលពីល្ងាចថ្ងៃអាទិត្យ ដើម្បីបង្កើតរដ្ឋាភិបាលចម្រុះ ដោយមានសេចក្តីថ្លែងការណ៍ពី PML-N បាននិយាយថា កិច្ចប្រជុំនេះគឺ ដើម្បី”ស្ថាបនា” ហើយទាំងពីរភាគី ក៏បានសម្តែងការប្តេជ្ញាចិត្តក្នុងការដាក់ផលប្រយោជន៍របស់ប្រទេសជាតិ និងសុខុមាលភាពលើសពីអ្វីៗទាំងអស់ ។

ទោះជាយ៉ាងនេះក្តី មន្ត្រី PML-N និង PPP បាននិយាយថា ការពិភាក្សារបស់ពួកគេត្រូវបានជាប់គាំង និងនៅតែមិនអាចចែកឱ្យដាច់បានឡើយថា តើមេដឹកនាំណានឹងទទួលការងារកំពូល។

ឥស្សរជនជាន់ខ្ពស់ PML-N ដែលស្និទ្ធនឹងគ្រួសារ Sharif បានប្រាប់រ៉យទ័រថា “ភាគីទាំងពីរចាប់អារម្មណ៍ក្នុងការបង្កើតក្រុមចម្រុះ ប៉ុន្តែមិនទាន់មានការទម្លាយទេរហូតមកដល់ពេលនេះ។ ភាគីទាំងពីរនៅតែចង់បានការិយាល័យនាយករដ្ឋមន្ត្រី មកអង្គុយរៀងៗខ្លួន ៕

ប្រែសម្រួលដោយ÷ ប៉ោ កុសល

ប្រភព÷ Rueters