កីឡា

ប្រាក់រង្វាន់ជាង៧៨ម៉ឺនដុល្លារដល់ដៃជយលាភីកីឡាអន្តរជាតិថ្ងៃនេះ

បានផុស

២ years មុន

នៅ

ថ្ងៃចន្ទ ២៦ កុម្ភៈ ២០២៤

ដោយ

រាជរដ្ឋាភិបាលកម្ពុជាតាមរយៈសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានផ្តល់ប្រាក់រង្វាន់លើកទឹកចិត្តជាង៧៨ម៉ឺនដុល្លារអាមេរិកដល់ជយលាភីមេដាយពីការប្រកួតអន្តរជាតិកាលពីឆ្នាំ២០២១ ២០២២ និង២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានឲ្យដឹងថា សម្រាប់ជយលាភីដែលទទួលបានប្រាក់រង្វាន់លើកទឹកចិត្តពីរាជរដ្ឋាភិបាលនៅរសៀល ថ្ងៃទី២៦ ខែកុម្ភៈ ឆ្នាំ២០២៤ គឺម្ចាស់មេដាយមាស ប្រាក់ សំរិទ្ធ គ្រូបង្វឹក និងគ្រូជំនួយពីការប្រកួតកីឡាជ្រើសរើសជើងឯកអាស៊ីអាគ្នេយ៍ អាស៊ី ពិភពលោក និងកីឡាសកលវិទ្យាល័យអាស៊ាន។

ប្រាក់រង្វាន់ត្រូវបានផ្តល់ជូនទៅតាមកម្រិតខុសៗគ្នាគឺកម្រិតអាស៊ានផ្សេង កម្រិតអាស៊ីផ្សេង និងកម្រិតពិភពលោកផ្សេង ប៉ុន្តែបើគិតប្រាក់រង្វាន់សរុបដែលត្រូវបានប្រគល់ជូនជយលាភីនៅពេលនេះគឺចំនួនជាង៧៨ម៉ឺនដុល្លារអាមេរិក។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីដែលបានអញ្ជើញជាអធិបតីក្នុងពិធីប្រគល់ប្រាក់រង្វាន់នេះបានផ្តល់អនុសាសន៍៤ចំណុចដល់អត្តពលិក និងគ្រូបង្វឹកដើម្បីយកទៅអភិវឌ្ឍកាន់តែល្អប្រសើរ។ ទី១ ក្រសួងអប់រំ យុវជន និងកីឡាត្រូវសហការជាមួយសហព័ន្ធកីឡាជាតិឲ្យបានម៉ត់ចត់ដើម្បីបណ្តុះបណ្តាល និងបង្វឹកបង្ហាត់ឲ្យមានប្រសិទ្ធភាព។ ទី២ ក្រសួងអប់រំ យុវជន និងកីឡាត្រូវសហការជាមួយសហព័ន្ធកីឡាជាតិដើម្បីបណ្តុះបណ្តាលថ្នាលយុវជនឲ្យបានល្អដើម្បីត្រៀមការប្រកួតអន្តរជាតិ។ ទី៣ អត្តពលិក និងគ្រូបង្វឹកត្រូវខិតខំហ្វឹកហាត់ឲ្យបានដិតដល់សម្រាប់ការប្រកួតនាពេលខាងមុខ និងទី៤ គណៈកម្មាធិការជាតិអូឡាំពិកកម្ពុជា និងសហព័ន្ធកីឡាជាតិត្រូវបង្កើនកិច្ចសហការជាមួយស្ថាប័នកីឡាកម្រិតអាស៊ាន អាស៊ី និងពិភពលោក។

ប្រភេទកីឡាដែលទទួលបានប្រាក់រង្វាន់មានដូចខាងក្រោម៖

មេដាយប្រាក់៤ សំរិទ្ធ៣ ពីការប្រកួតកីឡាជឺជីតស៊ូ ជើងឯកអាស៊ី លើកទី៧ ឆ្នាំ២០២៣ នៅប្រទេសថៃ
មេដាយប្រាក់១ សំរិទ្ធ២ ពីការប្រកួតកីឡាតេក្វាន់ដូ WTF ជើងឯកអាស៊ាន លើកទី១៦ ឆ្នាំ២០២៣ នៅប្រទេសហ្វីលីពីន
មេដាយមាស៣ សំរិទ្ធ១ ពីការប្រកួតកីឡាហែលទឹកជើងឯកពិភពលោក ឆ្នាំ២០២២ នៅប្រទេសថៃ
មេដាយមាស១ ប្រាក់៤ សំរិទ្ធ៣ ពីការប្រកួតកីឡាទូកក្តោងជើងឯកអាស៊ាន ឆ្នាំ២០២១ នៅខេត្តព្រះសីហនុ
មេដាយមាស១ ពីការប្រកួតកីឡាកាយវប្បកម្ម ជើងឯកអាស៊ី លើកទី៥៤ ឆ្នាំ២០២២ នៅប្រទេសម៉ាល់ឌីវ
មេដាយមាស៣ ប្រាក់២ និង២ ពីការប្រកួតកីឡាប៉េតង់ជើងឯកអាស៊ី លើកទី២ ឆ្នាំ២០២២ នៅប្រទេសថៃ
មេដាយមាស៤ ប្រាក់១០ សំរិទ្ធ៣ ពីការប្រកួតកីឡារាំជើងឯកពិភពលោក ឆ្នាំ២០២២ នៅប្រទេសវៀតណាម
មេដាយមាស១០ ប្រាក់៩ សំរិទ្ធ១០ ពីការប្រកួតកីឡាវ៉ូវីណាមជើងឯកអាស៊ាន លើកទី៦ ឆ្នាំ២០២៣ នៅរាជធានីភ្នំពេញ
មេដាយមាស២ ប្រាក់៥ សំរិទ្ធ៥ ពីការប្រកួតកីឡាឃីកបុកស៊ីងជើងឯកអាស៊ី ឆ្នាំ២០២២ នៅប្រទេសថៃ
មេដាយប្រាក់១ សំរិទ្ធ១ ពីការប្រកួតកីឡាប្រដាល់សកលជើងឯកអាស៊ី ឆ្នាំ២០២៣ នៅប្រទេសថៃ
មេដាយមាស៣ ប្រាក់៣ សំរិទ្ធ១៣ ពីការប្រកួតកីឡាចំបាប់ជើងឯកអាស៊ាន ឆ្នាំ២០២២ នៅរាជធានីភ្នំពេញ
មេដាយមាស២ ប្រាក់៣ សំរិទ្ធ៨ ពីការប្រកួតកីឡាសាកលវិទ្យាល័យអាស៊ាន លើកទី២០ នៅប្រទេសថៃ

អត្ថបទ៖ វីរបុត្រ

Related Topics:កីឡាហែលទឹក កីឡាកាយវប្បកម្ម កីឡាជឺជីតស៊ូ

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា