លោក ម៉ែន អេង ដឹកនាំក្រុមការងារចុះពិនិត្យ ប្រឡាយ ស្រះទឹក អណ្តូងទឹក ជូនពលរដ្ឋនារដូវប្រាំង

នៅថ្ងៃអាទិត្យ ទី២៨ ខែមេសា ឆ្នាំ២០២៤ លោក ម៉ែន អេង អភិបាលរងខេត្តស្វាយរៀង បានដឹកនាំក្រុមការងារចុះត្រួតពិនិត្យប្រឡាយ ស្រះទឹក អណ្តូងទឹកជូនប្រជាពលរដ្ឋ នារដូវប្រាំង ក្នុងភូមិសាស្ត្រស្រុកកំពង់រោទិ៍ ខេត្តស្វាយរៀង។

ក្នុងការចុះត្រួតពិនិត្យនេះ ក៏មានវត្តមានចូលរួមពីលោក សុខ សុទ្ធាវុធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក កែវ ច័ន្ទលី ប្រធានមន្ទីរព័ត៌មានខេត្ត លោក សំ នីតូ ប្រធានមន្ទីរអភិវឌ្ឍន៍ជនបទ លោក ឃុត គីម អភិបាលរងស្រុកកំពង់រោទិ៍ លោកស្រី សំ កញ្ញា មេឃុំបន្ទាយក្រាំង និងមន្ត្រីដែលពាក់ព័ន្ធជាច្រេីនរូបទៀត។

លោក ម៉ែន អេង បានលើកឡើងថា ទុក្ខកង្វល់របស់ប្រជាជន គឺជាទុក្ខកង្វល់របស់មន្ត្រីគ្រប់លំដាប់ថ្នាក់។ ដូច្នេះហេីយ រាល់ពេលដែលប្រជាពលរដ្ឋជួបទុក្ខ គឺត្រូវតែមានមន្ត្រីចុះជួយ សួរសុខទុក្ខ សម្របសម្រួលឱ្យការរស់នៅរបស់ពលរដ្ឋ បានស្រួលជាប្រចាំ និងដោះស្រាយបានទាន់ពេលវេលា។

លោក បន្តថា គ្រប់មន្ទីរដែលពាក់ព័ន្ធត្រូវធ្វេីការសហការគ្នា ដេីម្បីទទួលបានទិន្នន័យពីថ្នាក់ឃុំសង្កាត់ ក្រុង ស្រុក ដែលមានបញ្ហាជួបគ្រោះរាំងស្ងួត ឬខ្វះខាតទឹកប្រេីប្រាស់ ជាដេីម ឬឃុំសង្កាត់ ដែលកំពុងប្រឈមនឹងបញ្ហានេះ ដេីម្បីដោះស្រាយ និងត្រៀមបង្កាជូនប្រជាពលរដ្ឋបានទាន់ពេលវេលា។

ជាចុងក្រោយ លោក ម៉ែន អេង ក៏បានផ្តាំផ្ញើឱ្យប្រជាពលរដ្ឋ ត្រូវយកចិត្តទុកដាក់ខ្ពស់ពីសុខភាព ញាំទឹកឱ្យបានច្រេីនព្រោះថាពេលនេះអាកាសធាតុក្ដៅខ្លាំងណាស់៕

ដោយ៖ ភក្ដី